Rally batok corruption

Sa makausa pa, midagsa na usab kagahapon sa kadalanan sa nasud, ilabina sa Metro Manila ug Metro Cebu, ang liboan ka katawhan aron pagkondena sa walay kamatayon nga problema sa corruption sa kagamhanan.

Ang dakong rally, nga gitumong gayud sa Bonifacio Day, nagdala sa klaro nga mensahe nga ang mga responsable sa pag-abuso ug pagpangawkaw sa salapi sa katawhan kinahanglan gayud nga managot.

Grabe na ka pervasive ang corruption dinhi sa Pilipinas. Ug kini usa ka sakit nga dugay nang miatake sa matag sanga ug sistema sa gobiyerno. Apan samtang lig-on ang panawagan sa katawhan alang sa hustisya ug accountability, adunay pipila ka tingog nga nanawagan sa resignasyon sa Presidente.

Klaro nga kining mao nga panawagan, bisan pa sa kasuko sa publiko, wala sa tuno. Kon atong tan-awon,  ang Presidente mismo ang  mimando sa usa ka hugot ug lawom nga imbestigasyon sa mga anomalya sa implementasyon sa mga proyekto sa flood control tibuok nasud.

Nakasabot kita sa tumong sa maong rally nga kinahanglan manubag kadtong mga corrupt ug kawatan nga mga opisyal sa kagamhanan. Ug nga angay lamang silang itaral ngadto sa hukmanan ug silotan.

Apan matawag nga premature usab ang panawagan sa ubang sektor alang kang Presidente Bongbong Marcos sa pag-resign. Dili kana maoy solusyon sa grabeng problema sa graft and corruption sa nasud.

Ang solusyon ning maong problema mao ang pagpatuman sa subsob nga kampanya batok sa corruption nga mora’g anay na nga mikutkot sa sistema sa matag ahensiya sa kagamhanan.

Ang pag-ulbo na usab sa rally kagahapon nagpamatuod laman nga buhi pa ang demokrasya ug ang tingog sa katawhan sa atong nasud. Apan hinaut nga dili malihis kining maong lakang nga mosangpot na hinuon ngadto sa usa ka dakong krisis sa politika.