Pagpangandam sa kanunay

Maayong Balita

Atong kakita dinhi sa ebanghelyo nga gitagna sa atong Ginoo kun unsay mahitabo sa mga katapusang mga adlaw. Nisibaw gyud ang iyang hagit nga mao man ang pagtukaw. Kay wala kita masayud sa panahon kun takna. Kinahanglan andam gyud kita niini.

Kasinatian

Daghang mga hitabo nga lisud tugkaron ning mga panahona karon. Apan wala kini magpasabot nga mao na kini ang katapusan. Puno sa kawalay kasegurohan ang kalibutan karon. Gikan sa ekonomiya, politika, ug bisan gani sa kinaiyahan. Mao nga mahinungdanon kaayo ang pagtukaw karong mga panahona. Kay lagi wala man kita masayud sa panahon ug takna. Kun nahimo kitang maigmaton sa pagpangandam panahon sa katalagman unta mamahimo kitang maigmaton usab diha sa atong pagpaabot sa atong Ginoo sa ikaduha niyang pag-anhi (Parousia). Sa iya na unyang pagbalik usa na siya ka makatarunganong maghuhukom alang sa iyang mga katawhan nga mao kita. Andam na ba kita alang niining maong hitabo?

Lihok

Kinahanglang anaa kita sa Presensiya sa Dios busa pag-ampo sa kanunay. Ato siyang sination diha sa atong katilingban ug mga kaigsuonan. Ato siyang alagaran diha sa mga ubos nga mga sakop sa hut-ong sa atong katilingban!

Pangamuyo

Tanan: Umanhi ka Ginoo! Ayaw paglangan! Sulod sa among kinabuhi ug harii ang among katilingban. Amen!