Wakeup call

Human sa trahedya nga dala ni Typhoon Tino, klaro nga ang Sugbo nag-atubang og dako ug seryoso nga hulga nga dili angay pasagdan. Ang pagbaha sa Metro Cebu ug probinsiya nagpakita kon unsa ka substandard ang mga proyekto sa flood control nga gipatuman sa niaging mga tuig.

Kini miresulta sa pag-antos sa mga Sugboanon, pagkaguba sa mga kabtangan ug paglurang sa lokal nga ekonomiya. Mao nang matag ting-ulan, normal na ang kahadlok sa katawhan sa mga pagbaha.

Ang Bagyong Tino nagsilbing wakeup call kanato nga kinahanglan na gayud ang konkretong aksiyon sa dakong problema sa pagbaha sa Sugbo. Dili na kita makapaabot pa og dugang kinabuhi nga makalas gumikan sa pagsuyla na usab sa mga sapa.

Kini tungod kay ang padayon nga kahuyang sa mga flood control projects nga giimplementar sa gobiyerno nagpasabot nga mas daghan pang kinabuhi ang makalas ug kabtangan ang mapurnada sa umaabot.

Gumikan niini, kinahanglan na nga iprayoridad ang implementasyon sa epektibong flood control projects. Ug kinahanglan nga wad-on na gayud ang politikal nga interes sa pagpatuman niini.

Ug angay lamang usab manubag ug moatubang sa korte ang mga opisyal ug kontraktor nga responsable sa substandard nga mga flood control projects.

Ang pagpakita og accountability mao ra’y paagi aron mabalik ang pagsalig sa katawhan ngadto sa kagamhanan.

Ang transparent ug lig-on nga proseso sa procurement ug monitoring makalikay sa korapsiyon ug palpak nga trabaho. Ug makapatigbabaw sa katungod sa komunidad nga maluwas gikan sa mga baha ug ubang katalagman.

Sa tinuoray, ang pagpanubag sa kapalpakan ug ang pagpatuman sa insaktong solusyon mao ang tinuod nga serbisyo publiko.

Ang katawhan dili angay mag-antos tungod sa kapakyasan sa sistema ug sa kawalay klaro nga direksyon sa mga proyekto.