Kaguliyang na!

Kahilakon ko sa kalipay nga nagtan-aw sa daghang mga sakyanan nga gipadala dinhi sa Cebu sa provincial government sa Lanao del Norte aron motabang sa mga nabiktima sa Bagyong Tino, ilabi na diha sa Liloan, Compostela ug Mandaue.

Mga 100 ka kawani sa Lanao del Norte provincial government ang gipadala dinhi ni Governor Mohammad Khalid Dimaporo aron manghatag og mga relief goods ug paghimo’g clearing operations, sama sa paghakot sa mga basura nga nagliundok daplin sa karsada.

Wa makaato og hakot ang mga trak sa basura sa mga lungsod sa Compostela ug Liloan, apil sa Mandaue City, tungod sa kadaghan sa mga hakotonon. Tiaw mo, giapil og labay ang mga dagko kaayong kotson, mga basa nga sinena nga tan-aw sa tag-iya di na nila kapahimuslan pa.

Nindot gyud nga magtinabangay ang mga Local Government Units (LGU) panahon sa katalagman. Mao nga kita sa Cebu, kanunay gyud kita nga mohatag og hinabang ngadto sa mga LGU nga makasinati og trahedya kay pinaagi niini, mogaan-gaan ang problema.   

Salamat kaayo taga Lanao del Norte!

* * *

Bisan pa og abogada si Claire Castro, ang spokesperson sa Malacañang apan naglisod siya’g tubag sa pangutana sa mga reporters kon unsa gyud ang hinungdan nga giilisan sa pwesto si Executive Secretary Lucas Bersamin.

Ang tinuod, way makabentaha ni Bersamin kon ang kwalipikasyon ang hisgotan kay usa siya ka retired Supreme Court justice sa wa pa itudlo ni Presidente Bongbong Marcos sa katungdanan.

Nahibawo si Castro sa tinuod nga rason, ug nasayod sab siya nga wa mo-tender og resignation letter si Bersamin, apan gipahibawo na dayon nga mi-resign kini sa pwesto.

Ang tinuod, lisud sab ang sitwasyon ni Castro kay nasayod siya sa tinuod nga hinungdan, apan gitan-aw niya nga posible nga makahatag og dili maayo kon iyang itug-an ang tinuod. Kon ako hinuon ang pangutan-on, moingon ko nga napugos na lang si Bersamin pagluwat sa pwesto kay nasabtan man niya nga gusto na ang presidente nga pulihan siya.

Sa akong paghinuktok, nakab-ot sa akong hunahuna nga ang pagtangtang ni Bersamin may kalambigitan gyud sa gihimo ni Undersecretary Adrian Bersamin, nga paryente ni Lucas.

Matud ni Zaldy Co, ang kanhi congressman sa Ako Bicol Partylist, human siya pahibaw-a ni Budget Secretary Amenah Pangandaman nga gusto ni Bongbong nga mag-inserto og P100 Billion sa 2025 Annual Budget, giingnan siya ni Pangandaman nga tawgon si Adrian Bersamin.

Si Adrian miingon sab niya nga si Bongbong maoy nag-order nga mando sa presidente nga mag-insert og P100 Billion sa budget. Mao gyud ni ang rason.