EDITORYAL - Hinay ang clearing Operation

Mag napulo na ka adlaw gikan sa pag-igo sa bagyong Tino nga nagbilin og dakong kadaut, nikalas og daghang kinabuhi. Samtang sa mga siyudad, nangabuni sa mga basura ug lapok ang halos tanang mga kanal nga agianan sa tubig.

Apan hangtud karon, wala pa gihapon hingpit mahawan gikan sa mga lapok ang mga daplin sa mga dalan. Gani sa ubang mga dapit, murag wala pa gihapon matandog ang mga nakabarang mga lapok sa ilang kanal.

Kung dili kini dalion og habwa ug hipos, siguradong molapaw na sab balik ang tubig baha kung moulan, apan dili na unya gikan sa mga sapa kondili gikan ra mismo sa mga kanal diha duol ug palibot sa mga kabalayan.

Angay hinumdoman sa tanan, nga ang ting-ulan kutob pa ni sa Pebrero sa sunod tuig. Dili lamang bagyo ang angay kabalak-an nga magdala og grabeng pagbaha kay dili man kada semana dunay bagyo.

Bisan ang ordinaryong pagbunok sa ulan karong panahona mabutang ang mga tawo sa peligro aning mga lunop sa tubig baha. Kay wala pa gihapon hangtud karon nalimpyohan ang mga kanal sa mga kadalanan.

Sa pagkakaron, ang makita palang nga nahawan mao ang mga lapok nga niawas sa dalan gikan sa mga nisulyang mga sapa, nga igo ra gitapok ug gipangsulod sa sako apan wala pa panghakota.

Ang mga kanal kilid sa mga dalan wala pa maablihi ug wala pa makuha ang nabuning mga lapok. Kung mobunok na sab ang kusog nga uwan, asa man mopadulong ang tubig. Kuwang kaayo ang kagamitan ug mga tawo sa mga lokal nga kagamhanan aron mapadali kini.

Bisan gani ang ubang barangay, nabantayan nga hinay sab kaayo ilang clearing operation sa ilahang tagsa-tagsa ka mga barangay tungod gihapon sa maong rason.

Busa, kinahanglan gyud tingaling ang mismo ng mga apektadong komunidad ang molihuk paghawan dili lang sa sud sa ilang balay ug tugkaran, kinahanglan nilang magtinabangay paghawan sa ilang kumon nga mga kanal o agianan sa tubig. Kay kung magpaabot pa sila sa ilang LGUs, basin malunopan sila pag-usab bisan sa ordinaryong uwan.