Mga Bayani sa katalagman

Luyo sa nasinating katalagman ilabi na sa pag-igo sa Bagyong Tino sa Sugbo, mipatim-aw ang mga bayani kinsa andam mobuhis sa ilang kinabuhi basta maluwas lang ang mga tawo, bisan sila mismo ang nabutang sa peligro ug ang ilang pamilya. Lakip na ang kinse anyos nga si Jayboy Magdadaro nga nakaluwas og dili mominus sa 50 ka mga tawo didto sa Villa Lara sa lungsod sa Liloan. Sila mismo ang mibalhin sa balay sa iyang maguwang sa usa ka subdivision apan didto naman hinuon sila na-corner sa pagsaka sa baha busa nagpa rescue sila sa iyang amahan ug mga uyoan.

Pagkahuman nga naluwas sila ug dihang medyo nihubas na ang baha, gigamit ni Jayboy ang bangka sa iyang uyoan ug ang salbabida nga maoy iyang gipasakyan sa mga tawo, ilabi na ang mga mabdos ug mga tiguwang. Nanakit kuno ang iyang lawas pagkahuman sa iyang gihimo. Gihatagan og kwarta si Jayboy sa iyang mga naluwas apan wala niya kini dawata kay pareho kuno silang galisod. Giuwan karon og blessings ang bata kay multiple offers sa scholarship ug mga cellphones, cash ug uban pa. Angayan ra usab nga makadawat og grasya ang bata sa iyang gihimo.

Ikaduhang bayani ang 24-anyos nga si Joshua Sandal, sa lungsod sa Liloan gihapon. Si Sandal marka bahala sa iyang pagluwas sa walo ka buwan pa nga masuso nga anak sa ilang silingan nga nagkurog sa katugnaw samtang nagpatong sa atop sa balay taliwala sa sulog ug lawom kaayo nga baha.

Nahadlok man si Joshua apan gisalig niya ang tanan sa Ginoo wala sila magpanuko iyang giluwas ang bata ug ang pamilya niini ug nilampos siya sa iyang gihimo. Angayan gyud usab siyang hatagan sa pagsaludar kay daghan usab nga kinabuhi ang iyang nasalbar. Gani hapit pa siya madisgrasya kay nabanggaan siya og gapnod o torso. Maayo nalang kay giiway siya sa kaalautan.

Laing bayani si Carlo Partulan, 30 anyos sa Barangay Lusaran sa dakbayan sa Sugbo kinsa gigamit niya ang iyang kamot ug gihunat ang tanang kusog aron maguba ang kisame ug ang atop sa balay dihang nakorner na sila sa baha. Kay kong wala niya maguba mahurot sila og kamatay kay nilawom naman gyud ang tubig. Ang imposible gihimo niyang posible aron maluwas ang iyang mga ginikanan, mga igsoon ug ang iyang tulo ka mga anak ug asawa.

Graduating pud diay siya sa BS Criminology ug anad sa pakusog. Apan iyang gasalig ang tanan sa Ginoo nga maoy naghatag kaniya og igong kusog nga makasugakod sa dakong pagsuway nga ilang nahiaguman. Ang iyang amahan nga kapitan sa Lusaran, Agustine Partulan, ang naa sa iyang luyo nga naggiya kaniya kong unsay angayan nga himoon. Misaler ang father and son tandem sa ilang pursuit of survival ug nilampos sila.

Daghang mga bayani nga wala lang mailhi o mag-viral. Tanan seguro kanato adunay superhero sa atong kahiladman nga atong magamit sa panahon nga kita gikinahanglan. Mas maayo pa ang mga ordinaryong tawo kay dunay nahimong kaayohan sa isi’g ka tawo. Ang mga opisyal sa gobiyerno ambot lang, nakapakita na ba kaha sila sa mga dapit nga ilang kanhi gikampanyahan. Kay base sa akong naadtoan nga mga dapkit, wala pa man. Kong dili gani sila mohimo sa ilang tampo paghatag og serbisyo sa mga tawo, siya ang mga walay pulos nga mga kontrabidang manggamitay lang nga angayan nga patyon sa atong kasing kasing ug panumduman aron makalimtan inig abot sa eleksiyon ato silang ilubong.