Kalayo ra's Bacayan

Ang Sitio Banawa sa Barangay Guadalupe layo ra kaayo sa Barangay Bacayan, ang nahimutangan sa Villa del Rio ug uban pa nga subdivisions nga gilunopan atol sa Bagyong Tino.

Ang Banawa sakop sa Cebu City south district, samtang ang Bacayan nahimutang sa north district. Labing menos 15 kilometros ang gilay-on sa Banawa ug Bacayan.

Kon ang gitukod nga Monterraza’s de Cebu, usa ka high-end subdivision diha sa kabukiran sa Sitio Banawa, makamugna og baha, dili kini makabaha sa Villa del Rio sa Barangay Bacayan.

Kataw-anan kaayo ang maong report, nga gibalita gani sa usa ka media outlet sa Manila. Mao kana nga si Mayor Nestor Archival dihang gipangutana miingon nga “unfair” sab nga basulon ang Monterraza’s sa lunop ug baha sa Bacayan.

Way dapig-dapig, husto si Mayor Archival nga “unfair” tinuod kon ang Monterraza’s maoy basulon sa kusog nga baha sa Bacayan. Kataw-anan. Tan-aw nako, wa molaban si Mayor Archival sa Monterraza’s.

Tingali dunay nakaingon nga ang tagdumala sa Monterraza’s nakakita’g “kakampi” sa mga misaway kanila, kay si Mayor Archival miingon man nga “unfair” ang pagbasol sa Monterrazas.

Nasabtan nako nga ang pag-ingon ni Mayor Archival nga “unfair” kay gibasol man gud ang Monterraza’s nga kuno maoy nakaingon sa pagbaha sa Bacayan. Husto si Mayor Archival kay dili kini tinuod.

Gani, gipaimbestigar ni Mayor Archival ang report nga ang Monterraza’s de Cebu nakamugna og paglunop, apan diha ra sa pipila ka mga dapit sa Labangon, Tisa, Banawa ug kanait nga mga barangay sa ubos.

Bisan ako, nagtoo man gyud nga ang Monterraza’s de Cebu nga anaa sa ibabaw sa bukid sa Guadalupe makahatag gyud og problema sa lunop sa mga dapit sa ubos.

Giguba nila ang bukid, gipuril ang kakahoyan, gisemento ang daghang mga dapit kay gihimoan og karsada. Ang mga natukoran na og panimalay, gipangsemento sab.

Kon may uwan, ang tubig dili na motuhop sa yuta. Gikan sa atop sa kabalayan, direkta nga ang tubig modagayday sa drainage systems, ug modailos sa kinaubsan.

Nasayod ko nga ang gidaghanon sa tubig nga modailos gikan sa Monterraza’s de Cebu, dili mapiog sa gihimo nila nga drainage system nga anaa magsubay sa Gervacio Quijada Street ug kuno gipalabang aron adto ibuga ang tubig sa Guadalupe River.

Daghan pa nga mga luna sa Monterraza’s de Cebu nga wa pa katukuri og panimalay, ug tingali mao kini ang rason nga kon mag-uwan, dunay mga anapog ug yuta nga mokuyog sa tubig nga mabanlas paingon sa ubos.

Ang mga namuyo sa kinaubsan nangreklamo kay mabahaan ug malunopan sila og tubig nga daw sagol ba'as.