Pag-abot sa katalagman

Dili gayud nato matag-an ang panahon, ilabina pag-abot sa mga katalagman.

Kini bisan pa man sa grabe ug kanunay nato nga pagpangandam. Ang Kahitas-an ra gayud ang nasayod sa tanan.

Sama na lamang sa naagian nako ug sa akong pamilya niadtong paghapak ni Bagyong Tino.

Wala mi magtuo nga apil mi sa makatilaw sa mapait nga kasinatian paglapdos sa maong kalamidad.

Sa wala pa miabot ang Bagyong Tino niadtong Lunes sa tungang gabii, confident kaayo kami nga luwas ra ang among pinuy-anan sulod sa usa ka subdivision sa Barangay Biasong sa dakbayan sa Talisay.

Gani sa nangaging mga bagyo, wala gyud kami nabahai, bisan niadtong pagragasa sa Bagyong Odette kaniadtong 2021 nga usa sa labing ngilngig nga katalagman nga mihapak sa Sugbo.

Apan nianang pagka Martes sa sayong buntag, napugwat mi sa among pagkatulog dihang nagyagaw na ang among nga silingan.

Diay misaka na ang tubig sulod sa among subdivision sa dihang miawas ang Mananga River.

Misulod g'yud ang baha sa among sala lahos ngadto sa kusina.

Ug mibasa kini'g daghan sama sa appliances, refrigerator ug uban pa. Hasta ang among sakyanan nasudlan g'yud og tubig. Maayo na lamang kay miandar pa kini.

Hinuon, dako among pasalamat sa Kahitas-an tungod kay safe ra ako ug ang akong pamilya.

Kini bisan pa man sa among ka taranta ug dayong saka sa second floor aron pagluwas sa among mga kinabuhi.

Anaa ra gayud sa kamot sa Labaw nga Makagagahum ang tanan. Ang atong pagsalig sa Kahitas-an inubanan sa kanunay nga pagpangandam maoy makaluwas kanato sa bisan unsa nga katalagman.