Baha sa mga saad
Dako ang problema ni Presidente Ferdinand Marcos Jr. Iyang State of the Nation Address (SONA) niadtong Hulyo 28, nga nikondenar ug nisaad pag-imbestigar ug pagsilot sa mga responsable sa lapad nga kinawatay sa flood control projects, wala moresulta sa gipaabot nga pagsulbong sa iyang popularidad.
Hinunoa, nakapasuko sa katawhan. Dul-an sa tulo ka buwan nang nisulbong ang mga protesta. Nag-apura nga sa labing daling panahon mapriso ug mabawi ang kinawat sa kinadak-ang mga kurakot. Nga naglakip dili lang sa iyang mga kaatbang kon dili sa kinakusgan sab niyang mga alyado.
* * *
Ang pagpasabot sa panginahanglan sa pagsubay sa due process–nga palig-unon ang mga ebidensiya ug patubagon ang mga gipasanginlan sa dili pa mapasaka ang mga kaso sa korte–napakyas pag-alam-alam sa katawhan nga sulod na sa daghang katuigan nga nanglangoy sa baha sa kada bundak sa uwan.
Wala katabang sa kampanya pagpakalma ang daghang ebidensiya sa ghost ug substandard projects ug bastos nga pagsalida sa social media sa kinawat nga katigayonan. Lisod pasabton ang mga magbubuhis nganong mapriso dayon ang snatcher pero siyam-siyaman una makasohan ang mga senador ug mga kongresista.
* * *
Tubag sa Malakanyang ang pagpabaha sa mga pasalig (nga hinaot matuman aron dili mosilaob ang kaguliyang):
Komprehensibo ang pagsusi sa P1.2 trillion scandal ug pagpalig-on sa mga ebidensiya aron pagsegurong makonbikto ang mga gipasanginlan;
Mapasaka nang pasiunang mga kaso nga walay piyansa sa Sandiganbayan ug regional trial courts sa sunod buwan;
Duna nay mapriso sa mga sinumbong, labi nang mga kontraktor ug mga opisyal sa Department of Public Works and Highways (DPWH), sa wala pay Pasko;
* * *
Mabawi nang P5.2 bilyones sa frozen bank accounts, mga yuta, mga sakyanan, e-wallet ug insurance bonds;
Mahuman ang husay ug mahukman sa Sandiganbayan ang mga kaso sulod lang sa unom ngadto sa walo ka buwan;
Tugotan ang livestreaming aron masubay sa publiko ang tanang detalye sa mga husay dili lang sa Independent Commission for Infrastructure (ICI) kon dili apil na sa Sandiganbayan; ug
Pagmatuod nga dili gagmay ray masilotan, nga kutob rang kanhi Kongresista Zaldy Co, dili mobabag ang administrasyon kon may mga ebidensiya batok ni kanhi House Speaker Martin Romualdez (hilom hinuon unsay mahitabo kon maapil ang presidente).
* * *
- Latest
