Duha ka dagway sa nag-ampo

Sa atong ebanghelyo karong Dominggoha dunay duha ka mga matang sa mga tawo nga nisulod sa templo. Ang usa pariseo samtang ang usa kobrador sa buhis.

Ang Pariseo kang kansang pulong pariseo gikan sa pulong purishim nga nagpasabot og the separated ones, pundok man sa mga tawo nga matawag natong elitista. Ilang gisunod ang balaod sa estrikto nga paagi.

Dalaygon kining maong pamaagi apan ang nakadaut mao nga sa ilang pagsunod niini, nahimo silang mapahitas-on.

Ug gani gihimo man nila ang ilang kaugalingon nga sukaranan alang sa uban. Hataas ang Ilang panlantaw sa ilang kaugalingon. Ubos ang ilang panltantaw sa uban.

Sa laing bahin ang mga kobrador sa buhis giisip man nga mga public sinners sa ilang kapanahonan, tungod ning mosunod nga mga rason:

1. Ilang gialagaran ang Roman Empire mao nga giisip silang mga traydor sa ilang mga katagilungsod.

2. Tungod sa korupsiyon. Ang opisina sa pagka kobrador sa buhis mahimong makab-ot pinaagi sa appointment sa Romanhong Gobernador ug mahimong paliton. Natural kun naghatag og kapital may gipaabot gyud nga return of investments.

Sayud ang maong kobrador sa  buhis niini. Mao kini ang hinungdan kun nganong diha sa iyang kaugalingon malisud alang kaniya ang pagyahat sa langit. Malisud alang kaniya ang pagdayeg sa Dios.

Hinunoa, nagpamukpok siya sa iyang dughan Dungan ang pag-ingon: “Kaloy-I intawon ako nga usa ka makasasala!” ug gitataw sa Ginoo nga ang kobrador sa buhis ug ang iyang pag-ampo maoy gidawat sa Dios ug dili ang pariseo ug ang iyang pag-ampo.

Diha sa atong panaw sa kinabuhing espirituhanon mahinungdanon kaayo ang pagpaubos ug pag-angkon sa atong kakabos kay wala man kinahanglana sa Dios ang mga halad sinunog kondili ang mapaubsanong kasingkasing ug mahinulsolong Espiritu.