EDITORYAL - Kabataan di angay pagamit

Niadtong Septembre 21,2025 mao ang adlaw sa pagtimaan sa deklarasyon sa Martial Law niadtong tuig 1972 ubos sa diktdoryang Ferdinand Marcos Sr., ang amahan sa kasamtangang presidente karon nga si Presidente Ferdinand Marcos Jr.

Nahaum kaayo ang mga lihuk protesta tungatunga aning kontrobersiya sa kurapsyon sa flood control projects nga naglambigit sa daghang mga kadagkoan sa Department of Public Works and Highways, mga kontraktor ug mga magbabalaod.

Gani naa pay nanawagan sa pagpakanaog sa presidente tungod sa pasangil nga wala kini gibuhat aron batokan kining kurapsyon.

Makalibog ang mga tawo, dili sila gusto og kurap, apan karon nga gigukod na ang mga kurakot, hasta ang presidente nga maoy pinakaunang miukay ug mipublikar aning tanan gusto sab nga pakanaugon sa posisyon.

Kung mahitabo nga mokanaog siya dili ba mahunong napud ning nasugdang mga imbestigasyon? Tabunan napud ang mga kasamtangang giimbestigar, wala nay kahumanan ang pagpangurakot. 

Naa pay uban nga gustong amungon ug gamiton ang militar ug kapolisan pinaagi sa pagpasangil nganong wala sila molihok batok sa gobiyerno.

Malisyoso na kaayo  ang ubang panawagan nga klaro kaayong dunay bulok politika ug dili na ang tinuoray nga tumong pagkontra sa kurapsyon.

Karon hasta ang mga kabataan hinayhinay nang giimpluwensiyahan , gigamit ang ilang kahuyang sa salabutan sa mga isyu ug mga sekretong agenda sa pipila ka mga politiko pinaagi sa pagsulsol aron sila magmartsa diha sa kadalanan.

Dili unta kalimtan sa kabataan nga dili porke naglagot sila  sa mga kurakot nga gipainit pa gyud sa ilang pasyon ug gustong mopadayag sa ilang kaugalingon diha sa kadalanan, likayan unta ang paghimo og kagubot ug kasamok, ilabi na kun duna nay masakitan ug mangaguba nga mga kabtangan sa publiko ug sa gobiyerno.  Dili lang ang kabataan ang ug dunay katungod masuko sa gobiyerno moprotesta kung dunay sayup ang gobiyerno, apan dili kini rason aron maghimo og kagubot.