Pagbudhi sa edukasyon
Tan-awa unsa ka walay kaluoy ang administrasyon ni Presidente Ferdinand Marcos Jr. sa mga estudyante ug mga magtutudlo nga nagpunsisok sa mga eskuylahang publiko:
146,000 ka classrooms ang kuwang sa pagsugod sa school year 2025-2026 niadtong Hunyo;
1,700 ra ka classrooms ang giplanong tukuron karong tuiga uban ang makalilisang nga budget nga P3 milyones kada classroom; ug
22 ra ka classrooms ang natukod ug 882 ka classrooms ang wala pay bisan usa na lang ka haligi nga napabarug kapin sa duha ka buwan na lay nahibilin sa 2025.
* * *
Sa paghimo pa lang sa national expenditure program (NEP), ang sugyot nga budget nga gisumiter sa Malakanyang ngadto sa Kongreso human sa State of the Nation Address (SONA) sa presidente sa Hulyo sa niaging tuig, 1.16% ra sa backlog sa classrooms ang gigahinan og kuwarta.
Human sa pagwatas-watas sa House of Representatives, sa Senado ug sa bicameral conference committee sa 2025 budget, nalaslasan pa gyod ang gahin sa edukasyon kay gipuno sa ilang pork barrel. Mao nga dayong tapos karong tuiga, 0.015% ra sa backlog ang natapakan.
* * *
Wala katabang sa kawsa pagpaluag sa public schools ang kadako ug kasayon sa kinawatay sa flood control projects. Maong nagkonsabo ang mga kongresista, mga senador, mga opisyal sa Department of Public Works and Highways (DPWH) ug mga kontraktor sa pagpalabi sa mga proyekto nga imbes makasulbad nakapasamot hinuon sa baha sa Sugbo ug ubang bahin sa Pilipinas.
Hinikalimtan (hinaot dili tinuyo) ang mas importante ug mas dinaliang panginahanglan sa pagpalambo sa kalidad sa edukasyon sa mga bata nga maoy ugma sa nasud.
* * *
Ambot may igo pa bang panahon sa pag-usab sa 2026 budget aron nga kuhaon gikan sa DPWH ang responsibilidad sa pagtukod sa classrooms ug ibalhin ngadto sa Department of Education (DepEd) ug local government units.
Hinaot nga maumol dayon ang mga lagda sa pagpalihok sa pribadong mga organisasyon ug mga kompaniya, sama sa Angat Buhay Foundation ni Naga City Mayor Leni Robredo, nga nipasalig nga mas paspas silang makatukod nga mas maayo ang kalidad sa mas barato nga presyo, dili rang kaabot og usa ka milyon ka pesos kada classroom.
* * *
- Latest
