Ikaw na ang moluwas sa imong kaugalingon

Dili na gyud ta katag-an sa panahon kong unsa ang mahitabo ilabi na sa linog nga wala pa gyuy teknolohiya nga maka-detect kanus-a motay-og.

Sa kasinatian nato niining bag-o lang dili gyud kasarangan kay sulod na sa tunga sa buwan pirme gyud ta giuyog sa mga aftershocks nga kusog nga feeling nato gaginhawa pirme ang yuta nga murag molamoy sa mga tawo.

Bisan og wala kitay kontrol sa paglihok sa kinaiyahan apan duna kitay mahimo nga kapanalipdan nato ang atong kinabuhi.

Bisan kinabuhi nalang atong segurohon bahala na ang mga kabtangan kay matukod ra man na og balik kong magusbat. Pinaagi sa ginagmay nato nga pagahimoon sama sa pag andam og go bag nga sudlan sa mga batakan nga panginahanglan nato.

Unsa man ni? Syempre mga pagkaon lakip niini ang easy open can nga ready to eat na, tubig nga manimo ug tambal ilabi na kadtong mga dunay maintenance medicine. Labaw sa tanan ang pito o whistle nga dako kaayong tabang aron makapadangat kita og signal sa mga rescuer, inay magsige og singgit og tabang nga makapaluya mogamit nalang og pito ug dili pud kalimtan ang flashlight nga gamay aron maghatag og kahayag kong mangita ka og agianan pagawas.

Kining pamaagiha daw gipakagamay ra ni sa kadaghanan ambot lang kong naghimo ba usab og mga inato nga "go bag" ang katawhan kay mora’g naghuwat pa man sa kagamhanan nga maoy mopalit ug ipang apod-apod kanila.

Pastilan ayaw na kita na mismo ang mohimo niini alang sa atong kaluwasan, palit lang gud og pila ka lata nga sardinas, beef loaf, Spam kanang maablihan ra sa kamot. Apili og mga biskwit o crackers, pwed apilan og mani kay makasugakod na kini sa gutom.

Dili na ta nianang mentalidad nga maghuwat kanus-a tunolan sa gobiyerno kay kong dili pa na ihatag nimo ug maunhan na sa pagtay-og sa linog o pag-abot sa bagyo aw segurado ikaw ra ang mag-antos.

Timan-i kita mismo ang makaluwas sa atong kinabuhi ug makaluwas pa kita og laing kinabuhi kong sakto ang atong pagpangandam sa dili pa moabot ang katalagman. Mga basic needs ni atong gihisgotan, labtikan pud nato ang atong pinuy-anan, aron luwas gyud maghimo nalang pud ta og pulos kawayan nga mauyog uyog ra kong dunay motay-og nga linog. Puwede pud kadtong mga kwartahan mogamit og techology nga pang earthquake proof ang ilang pinoy-anan nga dili gyud mahungno sa kusog nga linog.

Kining pagtay-og sa linog nagpakita kini kon giunsa sa pagtukod ang mga edipisyo nga basta basta lang ang resulta mahugno kay dili man makasugakod sa mga moabot katalagman. Hinuon bisan unsa pa ka lig-on ang edipisyo nga gitukod kong ang kinaiyahan na ang molihok sa usa pagpamilok mawagtang kining tanan. Busa angayan lang kitang mangandam inubanan sa hugot nga pag ampo sa Kahitas-an.