ICI: Mopakita di motago
Walay komentaryo ang Malakanyang sa mga taho nga si retired Supreme Court Senior Associate Justice Antonio Carpio ang usa sa ilang gitanyagan pero nibalibad sa pagka chairperson sa Independent Commission for Infrastructure (ICI). Si Carpio hilom sab sa isyu pero niapil sa Trillion Peso March niadtong Septiyembre 21.
Tak-om sang palasyo sa sulti ni retired Supreme Court Associate Justice Estela Perlas-Bernabe, nga nitug-an nga gitanyagan siya ni Presidente Ferdinand Marcos Jr. og puwesto sa ICI, nga magpabilin sa SM Prime Holdings nga itudlo niyang independent director human niretiro niadtong 2022.
* * *
Gawas nga pipila ray nakaila sa nanumpa nga chairperson sa ICI nga si retured Supreme Court Associate Justice Andres Reyes, dili makadugang sa pagsalig sa publiko niya ang posibilidad nga gitanyagan ra sa puwesto human nibalibad silang Bernabe ug Carpio.
Labaw nang dili makatabang sa credibility ni Reyes kay nipabor siya ni Senador Jinggoy Estrada nga giawhag nga pasakaan og buwag nga mga kasong pagpangawkaw sa desisyon sa Korte Suprema pagpatigbabaw sa kasong plunder tungod sa iyang pagka apil sa pork barrel scandal ni Janet Lim Napoles niadtong 2018.
* * *
Makakuha ang ICI sa lapad nga suporta sa publiko, nga maoy gikinahanglan aron magmalampuson sa pag-imbestigar ug paggukod sa mga labing kawatan sa Trillion Peso scandal sa flood control projects, kon ipakita sa katawhan ang ilang public hearings.
Kon i-livestream ang mga imbestigasyon sa ICI makatabang ang mga magbubuhis sa pagsusi unsa kakatuohan ang mga saksi, unsa katakos, kakasaligan, kamatinud-anon ug ka walay gidapigan sa mga imbestigador ug unsa kalig-on ang mga ebidensiya.
* * *
Ang pagserado gikan sa publiko sa mga husay sa ICI makapasamot lang sa pagduda nga ang tinuod nga tuyo sa imbestigasyon mao ang pagpanggukod sa mga kaatbang sa administrasyon ug pagpanalipod sa ilang mga alyado sa politika.
Mahimong dili sama kamakapa-ukyab sa Senate Blue Ribbon Committee ang pinangutan-an nilang Reyes ug ubang mga sakop sa ICI, pero palabihon sa mga magbubuhis ang panghuy-ab kay sa blangkohan sa dagan sa imbestigasyon. Gamay na lang og kuwang nga mohagtos nang kasuko sa katawhan. Hinaot nga dili mohimo og bisan unsang lakang ang Malakanyang sa pagsabotahe sa determinadong kampanya sa pagbisto sa kamatuoran.
* * *
- Latest
