Krus ni Kristo

Ang krus diha sa tawhanong panlantaw usa man ka simbolo sa kaulawan. Kasagaran nga gilansang sa krus kaniadto ang pagaisipon man nga worst of all criminals.

Dili lang kini mahitungod sa paglansang sa gisilotan sa kamatayon kondili usab sa pagpakaulaw kaniya hangtud sa katapusang gutlo sa iyang gininhawa. Butang ug kasinatian nga bisan gani ang atong Ginoo wala makaikyas.

Apan ang maong kamatayon sa atong Ginoo wala man makapugong ni makahunong sa iyang kawsa ug misyon. Hinunoa, ang maong kamatayon usa man ka sinugdanan alang sa mas makahuloganon nga mga panghitabo.

Siya namatay aron kita nabuhi. Ang iyang kamatayon kaluwasan man nato aron sa atong pag-ambit sa iyang pag-antos mabatonan nato ang atong kaluwasan ingon man kadaugan batok sa gahom sa kangitngit.

Didto sa balabag sa krus ni Kristo gibuntog ang karaang kaaway nga mao ang yawa. Ang yawa nga mapagarbohon kaayo.

Apan sa maong pagpagarbo nasinati niya ang iyang kaparotan didto mismo sa balabag sa krus.

Tungod niini angayan kitang magpasalamat nga nahimo kitang Kristiyano Katoliko.

Nga sa ato pa, kining maong timaan sa krus maoy nakapahimo natong iya ni Kristo busa angayan lamang nga ato kining hangpon  ingon nga mahinungdanong kabahin sa atong panaw. Ang krus ingon nga kaakuhan resultado sa matang sa bokasyon nga atong gisubay.

Ang krus ingon nga sakripisyo pag-ambit man nato sa sakripisyo nga gihalad sa atong Ginooa lang kanato. Kahigayonan usab kini nato aron mamahimong hingpit ang atong kaugalingon.

Ang krus ingon nga tulay ang nidugtong kanato sa Dios (Vertical Direction) ingon man ngadto sa atong isi’g ka ingon (Horizontal Direction).

Sa matag saulog nato ning maong pangilin sa pagpasidungog sa krus unta kita dili bation og kalisang sa pagpas-an niini.