Eskandalo sa baha
Na-istorya nakong usa sa labing nasuhito sa pait nga kahimtang sa nasud ug sa katawhan nga nalumos sa lapad nga kinawatay sa trinilyon ka pesos nga budget para sa flood control projects sa nangaging katuigan.
Tugoting, sama sa gihimo sa mga politiko, mga kontraktor ug mga opisyal sa Department of Public Works and Highways (DPWH) sa mga proyekto nga ilang gipanguwartahan, akong i-chop-chop og kalima ang iyang kasayuran:
1. Makalilisang ang kuwarta nga gibubo sa mga senador ug mga kongresista sa DPWH kada tuig (karong tuiga gihatagan sila og P1.007 trilyones ug sa 2026 nangayo sila og P881 bilyones) maong makapatuyang sila ug ilang mga kakonsabong nalista sa ibabaw sa pag-imbento og bisan unsang mga gastohan;
* * *
1. Kay nasudnong problema mang baha ug wala may nikuwestiyon sa kadinalian sa panginahanglan sa sulbad, nahimo nilang paborito, uban sa naandan ug walay kahumanan nga road ug bridge expansions ug repairs, ang flood control projects (makapanghambog sa mga magbubuhis nga dunay gibuhat, nga sa samang higayon nahimong abunda kaayong tinubdan sa mga komisyon);
2. Samtang dunay pipila ka proyekto nga gitukod sa population centers nga labing nameligro sa baha, kasagaran gipahimutang sa mga probinsiya, mga syudad, mga lungsod ug mga barangay nga wala mahulga (maong mas daghan ug mas dagko ang flood control projects sa Malabuyoc ug sa ubang mga lungsod sa ikapitong distrito sa Sugbo kay sa mga siyudad sa Metro Cebu);
* * *
1. Kasagaran sa mga proyekto sayop ang desinyo (nipis ang semento ug kuwang ang kabilya) kay ang tuyo dili ang pagsagang sa baha ug pagpanalipod sa mga molupyo kon dili ang pagtilok ug pagpadako sa kawat sa tanang ang-ang sa transaksiyon, mas interesado sa pagpaburot sa ilang mga bolsa kay sa pagseguro sa kalidad sa proyekto; maong
2. Imbes kamenosan nisamot ang mga baha kay gibutangan og riprap ang mga tampi sa mga suba bisan sa bukirang mga barangay nga luwas untang makaawas ug masuyop sa bakanteng mga luna, maong mas daghan ug mas kusog ang bul-og sa tubig nga nihagsa sa patag, nikatap sa mga lugar nga wala pa sukad mabahai sa nangaging katuigan, nilubong sa kabalayan ug mga sakyanan, nikalas sa mga kinabuhi ug niggusbat sa mga kabtangan.
* * *
- Latest
