Sama sa baha, nalubog na ang isyu sa flood control project

Karon pa lang napanglantawan ko na nga walay padulngan kining imbestigasyon sa halapad nga pagpangawkaw sa panudlanan sa katawhang magbubuhis. Hinaut unta nga nasayop lang ko apan dili malikayan nga bation ko o kita sa sama niini nga pagduda tungod nagkalubog naman ang isyu sama sa baha nga molamoy nalang niini ug mamingaw kay malawgaw naman.

Adunay imbestigasyon sa Senado, lahi usab ang sa Ubos Balay Balauranan ug naa pay gipasiugdahan sa ehikutibo. Nganong dili naman lang sila magkahiusa kong seryoso sila nga makakab-ot og tinod-anay nga hustisya sa katawhang Pilipinhon nga maoy nabiktima niining mga tambaloslos ug tampalasan nga mga opisyal sa kagamhanan. Ang nahitabo karon nag inilogay sila sa spotlight kinsa ang mosikat sa ilang imbistigasyon.

Makadismaya alang natong mga yanong lungsoranon nga magtan-aw sa tataw kaayo nga gihimo karon nga paglubog sa isyu. Unang nagsusi niini ang Senado nga medyo nakapahaling sa kasibot sa mga tawo ilabi na dihang nakorner nila ang magtiayong Discaya nga mitug-an sa mga personalidad nga ilang kakunsabo sa pagsuyop sa pundo sa panudlanan sa atong nasud. Niadtong tungora ang mga kongresista halos ang nalambigit. Dinhi mipahigayon na usab og pakisusi ang Ubos Balay Balauranan ug nibalos pinaagi sa pamahayag sa napalagpot nga Assistant District Engineer sa Bulasan Brice Hernandez nga iyang gitumbok si Senador Jingoy Estrada nga nagbubo og kapin 300 milyones pesos nga proyekto, ug ginganlan usab niya si Senador Joel Villanueva.

Hangtud nausab ang dagan karon sa Senado human gikudeta nila si kanhi SP Chis Escudero ug gipulihan ni Senador Tito Sotto ug nausab ang tanan. Naa lang koy nabantayan ubos sa liderato ni Sotto nga gikinahanglan pa niini mananghid sa House Speaker unsay ilang himoon kang Hernandez nga ubos sa ilang husrisdiksyon human kini na contempt. Dihang mitambong si Hernandez sa hearing sa Ubos Balay Balauranan nihangyo nga dili na magpabalik sa Senado kay matud niya dili na siya safe ug tungod niini gikustodiya sa PNP ug hangtud na sa Pasay City Jail. Unta gibarugan ni Sotto ang ilang ground nga sila ang masunod.

Wala usab niya pirmahe ang resolution ni Senador Rodante Marcoleta nga himoong state witness ang magtiayong Discaya. Hinuon dili man gyud seguro mo qualify sila kay kong sa salida usa sila sa mga main characters sa pagkawkaw sa kwarta sa katawhan. Apan kong dili pwede ang magtiayong Discaya, kinsa man ang motumbok sa mga sama nilang mga buaya? Puwede si Brice Hernandez pero dili man seguro mokonektar ang iyang pamahayag. Ambot lang gyud.

Ang ubang mga kontraktor baya patay sa limod nga dili na gyud moangkon apil na si Engineer Alcantara nga matud niya walay mga nalambigit nga mga senador sa isyu sukwahi sa gibulgar sa iyang luyo luyo nga si Hernandez. Misamot ka lubog na ang isyu kay gikulitog naman sa Ubos Balay Balauranan ang paglambigit sa Duterte administration sa isyu. Gisugdan na nila og liko ang isyu nga tataw nga dunay buot panalipdan nga dili maduhig.

Bisan og binilyon ka pesos ang gilambigit ni Congressman Zaldy Co ug Speaker Romulades wala may tinguha ang mga imbestigador nga ipatawag sila aron makahatag og katin-awan. Hinuon wala man gyuy personal encounter ang magtiayong Discaya niining duha kay pulos name dropping ra man ang iyang nadunggan nga gigamit ang ilang ngalan, mahulog ra ni sa huhungihong ang tanan. Sa senado duna ba kahay makaako sa pagpatubag sa mga nalambigit nga kauban nila?

Kong walay padulngan kining mga imbestigasyon nga gihimo nila, posibleng ang mga tawo na ang mohimo og kinaugalingong lakang aron mapapanubag ang mga nalambigit sa halapad nga kurapsiyon.