Unsaon pagpilde si Frasco
Kon interesado kang makakuha sa P500,000 nga gipahibawo ni Kongresista Duke Frasco para ni bisan kinsa nga makamatuod nga dunay anomaliya sa flood control projects sa iyang distrito, palihug pangandami ang duha ka posibleng mga palusot nga gisukip sa mga kundisyon sa iyang pahibawo (“any credible information that may lead to the finding of any anomalies or irregularities”):
• Una, isalikway niya nga dili credible ang bisan unsang ipresentar nimong ebidensiya; ug
• Ikaduha, lalison niya ang bisan unsa nimong pangangkon nga dunay kahiwian ang iyang mga proyekto sa ikalimang distrito.
* * *
Pero ayaw kabalaka. Duna koy isugyot nga duha ka paagi aron imong makuha ang tunga sa milyon ka pesos nga gipasalig ni Frasco nga gikan sa iyang pribadong pitaka:
• Una, i-save ang opisyal nga video recording ug transcript sa press conference ni Presidente Ferdinand Marcos Jr. niadtong Agosto 11; ug
• Ikaduha, kopyaha ang tanang mga detalye nga gipahibawo sa Department of Public Works and Highways (DPWH) sa tulo ka flood control projects sa usa ra ka suba sa distrito ni Frasco nga nadaog sa higanteng construction companies ni Sarah Discaya.
* * *
Ang presscon nipahibawo sa findings sa pasiunang imbestigasyon nga gihimo sa central office sa DPWH human sa iyang State of the Nation Address (SONA) niadtong Hulyo 28. Nahisgutan sa presidente ang nitumaw nga daghang mga timaan sa anomalusong flood control projects sa tibuok nasud nga naglakip sa mosunod:
• Tinuyo nga pagbuak-buak sa dagkong mga proyekto ngadto sa
• Mas daghan nga gagmayng mga proyekto nga gi-copy-paste ra ang mga detalye ug susama ra ang budget.
* * *
Dili kalalis si Frasco sa mga sukaranan sa presidente pagmatuod nga anomalusong mga proyekto sa Cotcot River:
• Gi-chop-chop ang P397.5 milyones nga proyekto (nga ubos sa lagda sa DPWH isubasta sa regional office) ngadto sa tulo ka packages nga ang budget kada usa wala molapas sa P150 milyones (mao nga ang subasta gidumala sa Cebu 5th District Engineering Office, kansang district engineer gipasanginlang mas suod sa lokal nga mga politiko); ug
• Susama ang budget sa duha sa tulo ka flood control projects sa Cotcot River, P149.5 milyones ug P149.8 milyones.
Maong morag makabayad si Frasco.
* * *
- Latest
