EDITORYAL — Lifestyle check

Gimando ni Presidente Ferdinand “Bongbong” Marcos Jr. ang paghimo og lifestyle checks sa tanang government officials, matud pa ni Palace Spokeswoman Claire Casto sa press briefing kagahapon.

Haom kaayo kini kay gimando niya sab niya ang pag- imbestigar aning nangasakpan niyang mga anomalya sa mga flood control projects nga gibuboan og dakong pundo sa gobiyerno.

Apan ang pinakamaayo ug epektibo nga pamaagi ani, mao ang pag-exempt gyud unta sa tanang public officials ug mga kawani sa Bank Secrecy Law.

Kay kining mga proyektoha gihimong gatasan sa mga kawatang mga  opisyales sa gobiyerno pinaagi sa pagkigkunsabo sa mga kontraktor ug posible sab nga kalambigitan sa mga local officials.

Grabe ka-linoog kini nga matang sa krimen, kay gibutang nila sa ilang mga bulsa ang kwarta samtang gibutang nila sa peligro ang kinabuhi sa katawhan.

Kaning direktiba nagpasabot nga ang mga ahensiya sama sa Commission on Audit (COA), Bureau of Internal Revenue (BIR), Bureau of Customs (BOC), ug Local Government Units (LGUs) kinahanglang mosubay ug molili aning mga kontraktor ug ingon man public officials  nakatuman ba sa ilang mga rekisitos sama sa tax payments, permits, ug sa tanang legal requirements.

Ang maayo ani, basta na gani masugdan ang pag-imbestigar sa usa ka proyekto ug sa mga opisyales nga nagpaluyo ani, kinahanglang i freeze daan ilang mga bank accounts ug did-an sila sa pagbiyahe sa laing nasud.

Kung walay gahum ang mga imbestigador pag-utingkay sa bank accounts sa mga giimbestigar, maglisud ang pagsikop aning mga high- class nga kawatang nagtakuban nga mga magbabalaod.