Kasal taliwala sa baha
Taliwala sa walay kinutobang baha sa Sugbo ug ubang bahin sa nasud ug pagkabisto sa mga anomaliya sa trinilyon ka pesos nga flood control projects nga imbes makasulbad nakapasamot sa katalagman nga nakapatay sa kaliboan ka kinabuhi ug nakaguba sa binilyon ka pesos nga balor sa kabtangan, umahan ug imprastruktura, nitumaw’ng mga detalye sa kasal sa anak sa kontraktor sa Sugbo nga nangangkong bilyonaryo:
Gihimo ang kasal sa Cebu Metropolitan Cathedral ug ang reception sa Waterfront Cebu City Hotel and Casino; ug
Gasto sa kasal gibanabanang nikapin sa P20 milyones.
* * *
Gikasal silang Lyka Galeos and Jum Quirante, mga anak nilang Allan ug Zosima Quirante ug Edgardo ug Acjoeba Gallos. Maninoy ug maninay silang Senador Raffy Tulfo ug Kongresista Jocelyn Tulfo; kanhi Senador Manny Pacquiao ug Jinkee Pacquiao; Kongresista Sonny Lagon ug Kongresista Daphne Lagon;
Kongresista Ahong Chan ug Mayor Cindi Chan; Kongresista Edu Rama ug Jaja Rama; Kongresista Edcel Galeos ug Grace Galeos; BIR-7 Director Douglas Rufino ug Marissa Jude Alazas; Mayor Joie Perales ug Konsehal Amiboy Perales; DPWH Assistant Regional Director Ryan Gene Altea ug Grachelle Altea; Engineer Eric Prado ug Adora Galeos-Prado; Consolacion Vice Mayor Joyjoy Alegado ug Susan Pilapil; ug Takashi Fukuda ug Sachie Ogawa.
* * *
Gilingaw sa mga bandang CUESHE, South Border ug The Naughty Pandas ang 850 ang imbitadong mga bisita. Nga gi-reserbahan og mga kuwarto sa pipila ka andana sa Waterfront.
Nanambong silang Kongresista Lolypop Ouano ug Mandaue City Mayor Jonkie Ouano, Kongresista Rhea Gullas ug Talisay City Mayor Samsam Gullas, Minglanilla Mayor Rajiv Enad, Carcar City Mayor Patrick Barcenas, kanhi DPWH District Engineer Daisy Toledo, Engr. Chiqui Menina-Dy, Kristine Gonzalodo, Engineer Jerome Awit, Minglanilla Councilor Jay-r de la Calzada, ug Naga City Councilor Scott Juvenal Chiong.
* * *
Nibaha sa social media ang mga artikulo, klarong usa ray nagsuwat pero gi-copy and paste sa daghang users, nga nagdayeg ni Allan Quirante ug QM Builders. Kalit sang napapas sa Facebook ang mga letrato nilang Quirante, sa iyang asawa ug sa kalihokan sa QM.
Maklaro sa mosunod nga mga adlaw kon ang kalamposan ni Quirante pagsipong sa higanteng mga proyekto manakod ba sa iyang pagsuway pag-impluwensiya sa opinyon sa publiko.
0* * *
- Latest
