EDITORYAL — Iresponsableng aksyon sa China

Subling nanghasi ang mga sakop sa Chinese Coastguard nga gi-backup-an sa barkong panggubat sa Peoples Liberation Army-Navy (PLA-N) ang mga mananagat didto sa Bajo de Masinloc.

Tungod ani, gi-deploy sa Philippine Coastguard ang BRP Teresa Magbanua, BRP Suluan kauban ang MV Pamalakaya aron suportahan ang 35 ka mga fishing boats sa mga Pilipino ug hatagan og mga krudo ug supply.

Apan giharas sa CCG 3104 ang BRP Suluan pinaagi sa pagbomba niini og tubig ug gisuwayan sab kini og bangga sa PLA-Navy No. 164 nga usa ka Type-052D Destroyer gibanabanang 10.5 nautical miles sidlakang bahin sa Bajo de Masinloc (Scarborough Shoal). 

Apan nawani sa maniobra sa kapitan sa BRP Suluan ang mga barko sa China ug ang duha na hinuoy nagkabinggaay hinungdan sa pagkagusbat sa atubangang bahin sa CCG 3104 ug pagkaguba sa tibuok walang bahin sa Chinese destroyer ug pagkaangol sa ilang mga tripulante, duna pay nangatagak sa dagat.

Sa laktod, nag-unay ang ilang mga barko sa ilang dili makatarunganong pagpangilog sa teritoryo sa Pilipinas diha sa West Philippine Sea.

Sumala pa sa mga netizens ang gibuhat sa mga barko sa China dili binuhatan og tarong nga nasud. Kalapasan  kini sa Maritime Laws ilabi na ila kining gibuhat sulod sa 200 nautical miles exclusive economic zone sa Pilipinas.

Mas makaalarma pa gyud kay intensyonal nga suway unta nga lunoron sa Chinese destroyer ang BRP Suluan.

Tungod sa gidak-on sa maong destroyer ug gikusgon sa dagan, dako ang purohan nga malunod gyud ang BRP Suluan kun naigo kini ug posibleng dunay mangamatay.

Kun mahitabo kini, posibleng ipatuman ang Mutual Defense Treaty sa Pilipinas ug Amerika, magkagiyera gyud.

Apan nasayop ang destroyer ug ang kaubang CCG n sa pagkarkular. Nabanggaan hinuon sa CCG ang PLAN destroyer.

Matud pa dunay mga nangaangol nga mga tripulante sa CCG 3104 tungod sa kakusog sa pagbangga, ang uban nila nangatagak sa dagat.

Apan bisan pa man sa gibuhat sa Chinese CCG ug Chinese PLAN, ang mga barko sa PCG nga ilang giharas mao pay niradyo kanila aron sila tabangan tungod sa mga nangaangol.