Online gambling
Daghan na ko og estoryang nadunggan sa mga tawong napordoy ug naguba ang pamilya tungod sa pagkaboang sa sugal.
Dili na maihap ang mga kasinatian sa mga tawong nabaligya ang ilang mga personal nga kabtangan, lakip na sa mga panimay, tungod sa sugal.
Ug tungod sa pagkaylap sa sugal diha sa internet nga mahimo na nga ma access pinaagi sa cellphone, mas nigrabe ang hulga batok sa mga pamilya.
Ang mga sugarol, lahi kaniadto, wala kinahanglana nga moadto sa mga buwangan, hantakan, casino ug poker house.
Pinaagi sa cellphone mas sayon na nila kini nga ma access.
Ug ang makalilisang tungod kay way gipili, bata ug tiguwang mahimo na nga makapanugal.
Lisod ang pagbantay nga dili makasalmot sa sugal ang mga minor de edad.
Gawas sa drugas ang online gambling maisip nga dakong hulga sa kabataan ug sa pamilya nga angayang hatagan og pagtagad sa gobyerno.
Ug nalipay ko nga dunay mga opisyal sa dakbayan nga nakamatikod sa maong problema.
Ang konseho sa syudad pinaagi sa usa ka resolution nga giduso ni Konsehal Jaypee Labella, miawhag sa mga content creators, vloggers ug mga social media influencers nga dili mag promote ug online gambling.
Apan hinaot nga gawas sa awhag ngadto sa mga social media influencers ug content creators, dunay mas konkretong lakang ang kagamhanan aron mabadlong ang online gambling.
- Latest
