Water czar si Tommy O
Kon dunay makasubay sa labing kuwestiyonable nga mga transaksiyon sa Metro Cebu Water District (MCWD) kana mao si Cebu City Vice Mayor Tommy Osmeña. Kay siya ang nitudlo sa mga sakop sa board of directors nga nagdumala sa MCWD sulod sa daghang katuigan.
Nahibawo siya sa tanang posibleng palusot sa burukrasya sa MCWD nga niresulta ning labing grabeng krisis sa iyang 51 ka tuig nga kasaysayan: Kanihit sa suplay ug kataas sa presyo sa tubig sa wala rang kaabot og katunga sa kabalayan sa Metro Cebu nga naabtan sa serbisyo.
* * *
Kon dunay takos nga mosuway sa pagsulbad sa higanteng problema sa MCWD kana mao si Osmeña. Kay nahibawo siya sa tanang nahaunang mga plano sa pagpalambo sa suplay aron pag-apas sa panginahanglan sa tubig nga nisulbong nga populasyon.
Magamit niya ang tanang kasinatian ug pagtulon-an sa water system nga gisugdan sa iyang apohan nga si Sergio Osmeña Sr. pinaagi sa pagpaagas sa fountain sa Fuente Osmeña 113 ka tuig nang nilabay, pagtimaan sa labing unang pag-apud-apod sa tubig sa Buhisan dam agi sa mga tubo nga gikutay sa kabalayan.
* * *
Kon dunay kasaligan si Mayor Nestor Archival nga motutok sa krisis sa tubig, samtang nahigot sa sama kadinalian nga mga problema sa baha, basura ug panalapi, kana mao si Osmeña. Kinsa nakamatuod sa makadaghang higayon sa iyang talagsaong katakos.
Kon natukod niyang South Road Properties bisan sa pagbabag sa iyang mga kaatbang ug kon napabarug niyang Sugbo human sa Ruping bisan walay tabang sa nasudnong gobyerno, makalaom tang himuon niyang tanan sa pagtarung sa MCWD.
* * *
Kon dunay determinado nga mobalik sa kahapsay sa operasyon sa MCWD kana mao si Osmeña. Kay siya ang nagtudlo sa labing takos nga mga tagdumala nga naglakip sa negosyanteng si Ruben Almendras ug ni anhing Padre Francisco Silva.
Bisan sa kahinog na sa iyang pangedaron, si Osmeña dunay dugang insentibo sa pagtuman sa labing uwahi niyang misyon isip water czar: Apil sa iyang imbestigahon mao ang gikuwestiyon nga minilyon ka pesos nga balor sa mga transaksiyon sa higpit niyang mga kaatbang nga silang kanhi Gobernador Gwen Garcia, kanhi Presidential Assistant Mike Dino ug kanhi MCWD Chair Joey Daluz.
* * *
- Latest
