Giisnab hastang COA
Pagkamasinupakon. O pagkamasupilon (kon huwaman ang Binisaya sa karaang Bibliya). Maoy usa sa nangalisbong mga kabilin ni kanhi Gobernador Gwen Garcia. Puno sa iyang pagpamugos sa pekeng siyensiya sa Covid-19 ug African Swine Fever ug pagpabaya sa provincial hospitals (nga niresulta sa daghang kamatayon) ug pagpalabi sa mga paukyab, markahan si Garcia sa kasaysayan sa kagahi sa iyang bagulbagol.
Ang kinabug-atan nga premyo sa kamatinumanon ni Garcia sa iyang gusto mao ang pagkalubong og taga liog sa eleksiyon niadtong Mayo 12. Pero ang iyang pagkapilde, nahibawo na ta, wala sab niya dawata.
* * *
Gawas diay sa iyang pagsupak sa suspension order gikan sa Office of the President niadtong 2012, pag-ikyas sa dismissal order gikan sa Ombudsman niadtong 2018 ug pagsalikway sa preventive suspension order gikan sa Ombudsman niadtong Abril, duna pa gyoy laing ahensiya nga iyang giisnab hangtod sa pagkanaog sa Kapitolyo.
Wala tubaga ang findings sa Commission on Audit (COA) sa iyang mga transaksiyon sa 2023. Maong wala pa mapublikar sa website sa COA ang annual audit report (AAR) sa Cebu Province hangtod karon, duha ka tuig nang kalangay.
* * *
Nahibaw-an sa atong paboritong peryodista nga si Max Limpag gikan ni COA Central Visayas Director Visitacion Mendoza (kansang retirement ceremony gitambongan ni kanhi Commissioner Heidi Mendoza sa Sugbo karong bag-o) nga gipatubag ang administrasyong Garcia sa ilang audit findings ug recommendations niadtong Hunyo 26, 2024. Pero nagpabiling tak-om ang Kapitolyo bisan sa:
Follow-up letters sa COA niadtong Septiyembre 18, 2024 ug Oktubre 28, 2024; ug
Audit Observation Memorandum (No. 2024-006) niadtong Enero 17, 2025.
* * *
Ambot gituyo bang Garcia (nga mahimong gitambagan nga dili mapublikar ang audit findings kon dili sila motubag) o kumbinsido lang gyod nga walay si bisan kinsang makasugo niya. Nahadlok ko nga sa iyang hunahuna angayng magpasalamat ang mga Sugbuanon nga wala siya magbarikada.
Pila lang ka adlaw human nakalingkod si Gobernador Pam Baricuatro, wala papugong ang COA sa pagsuwat niya. Aron pagpahibawo nga kapin P143 milyones ang balor sa mga transaksiyon nga gibilin ni Garcia nga walay klarong kuwentada (kapin P126 milyones kinahanglan nga i-uli nilang Garcia ug ubang mga opisyal sa Kapitolyo ug mga kontraktor ug suppliers).
* * *
- Latest
