EDITORYAL - Mga drayber nga way ligo

Sa nanglabay nga mga adlaw, dunay mga natalang aksidente sa kadalanan nga naglambigit sa mga pasaheroan, partikular kining mga moderno PUJs apan sagad usa ray kumon nga hinungdan, nagsige og overtake.

Nahitabo kini diha sa may Marcelo Fernan Bridge nga niresulta sa pagkarambola sa lima ka sakyanan, tulo ka pribadong sakyanan ug duha ka pasaheroan diin ang modern PUJ ug ang multicab nga pasaheroan.

Dunay mga posts sa pipila sa mga pasahero gikan mismo sa modern PUJ nga nag-ingon grabe ka kaskasero ang ilang drayber ug nagsgie og pang overtake, mao nga di na gyud ikahibulong nganong nahitabo kadto.

Samtang dinhi sab sa may eskina V. Gullas ug Colon sa gabii sa samang adlaw, laing moderno PUJ sab ang nakasaghid og pribadong sakyanan ug nisuway pa gani og ikyas apan maayo nalang naabtan ug nababagan sa pribadong SUV.

Ang duha diha na pareho natanggong sa pikas nga lane ug nakabalda na sa trapiko. Apan ang drayber sa modern PUJ mao pay isog ug nagsige og pamusdak sa sud, samtang iyang mga pasahero nangatanggong ug nalangay.

Pipila lamang kini sa daghang mga aksidente nga gikalambigitan aning mga modern PUJ, kaskasero ang ilang mga drayber, wala na maghunahuna sa kaluwasan sa ilang pasahero ug sa ubang road users basta makauna lang pirme.

Dunay mga nanggawas nga estoryang tungod kini sa kamahal sa abang ug dunay quota nga kinahanglan nilang apason. Posibleng tinuod kini kay kung dili pa, dili tingali mag-ingon-ani ang mga drayber.

Apan dili lang kaning overloading ug pagka-kaskasero ang problema, kondili ang kinaiya ug taras gyud sa mga drayber nga dili motuman sa lagda sa trapiko. Gani ang uban lago o walay mga ligo, wa mag-uniporme, nagtsinelas ra ang uban ug daghan pang uban.

Maayo nga kada adlaw dunay operasyon ang taga LTO, Highway Patrol, LTFRB ug lokal nga traffic enforcers ani nila, aron magkinto ug mosunod gyud sa mga lagda kay peligroso kaayo sila sa publiko ug mismo sa ilang kaugalingon.