Mga depensa ni VP Sara
Sa iyang pagbalik sa Pilipinas human sa buwan nga pagpuyo sa The Hague si Bise Presidente Sara Duterte angay’ng makigsabot sa iyang mga abogado ug abogada (nga dili na maglakip sa iyang amahan pero apil pang iyang ugangan) unsaon pagpanghimakak nga peke ang mga ngalan nga nakadawat sa iyang confidential funds.
Imbes isalikway nga gamay ra kini kon ikumparar sa kaso sa iyang amahan, mosugyot mig unom ka posibleng depensa aron nga dili makonbikto sa impeachment trial:
* * *
1. Gimaniobra sa mga kongresista ang lista sa mga ngalan nga iyang gisumiter sa Commission on Audit aron pagpakauwaw niya (masakpan hinuon siya pinaagi sa pagkumparar sa lista nga nadawat sa COA ug sa mga ngalan nga gideklarar sa Philippine Statistics Authority nga mga peke);
2. Alyas ang mga ngalan para sa seguridad sa ilang informants (nga kalapasan sa Joint Circular 2015-01, ang giya sa paggasto sa confidential ug intelligence funds, CIF, nga nagsugo nga ang mga alyas kinahanglang paresan og selyadong lista sa tinuod nga mga ngalan);
* * *
1. Dili angay’ng tukion ang mga ngalan kay mas importante ang ilang natampo sa nasudnong seguridad (mapugos hinuon siya pagtug-an nga ang bugtong surveillance nga ilang nahimo mao rang pagdakop sa mangingilad nga nangolekta og kuwarta sa Bulacan ginamit ang ngalan sa Office of the Vice President);
2. Gitaktak nang mga trabahante sa OVP ug Department of Education nga nag-imbento sa mga ngalan (kinahanglan hinuong mag-andam og lista sa tinuod nga mga ngalan nga tinuod niyang gitaktak);
* * *
1. Tulisukon niya nga nagduka sa pagsusi tinuod bang mga tawo ang mga nipirma sa mga resibo ang gitudlo niyang security officers nga silang Koronel Raymund Dante Lachica sa OVP ug Koronel Dennis Nolasco sa DepEd (nga kinahanglang sabuton nga dili mopiyait sa tinuod nga destinasyon sa confidential funds kay nawad-an ra bag dugang allowances sa pagbungkag sa Vice Presidential Security and Protection Group); ug
2. Tulisukon ang ubang ahensiya nga naghimo sa samang palusot apil nang Office of the President nga P4.5 bilyones ang CIF (kay duphan man sa Kongreso si Presidente Ferdinand Marcos Jr., peligrong lilion hinuon wala bay Mary Grace Piattos ug Dodong Bunal nga nakadawat sa iyang CIF dihang mayor pa sa Davao City).
* * *
- Latest
