Mireklamo tungod sa kabaho sa babuyan

Dear Atty. Divine,

Naa mi mga silingan  nga nagbuhi og mga baboy  ug duol gyud mismo sa among balay. Ug tungod niini, grabe gyung baho-a atty. Pipila ka tuig na ning among problema kay panahon sa ting-init mangalisbo gyud ang baho sa hugaw gikan sa ilang baboyan ilabi na gyud kun dili nila matarong sa paglimpyo. Gawas sa baho, ang among atabay nga kawsanan sa tubig di na sab namo magamit kay adto man padung ang mga hugaw gikan sa ilang baboyan. Wa man gyud ni silay septic tank alang sa hugaw sa ilang mga baboy. Unsa may angayan namong buhaton aron masulbad ning maong problema? Daghang salamat og God bless. —Aragorn

Dear Aragorn,

Aron masulbad ang imong problema mamahimo nga mopasaka ka og reklamo ngadto sa barangay diin mo nagpuyo aron mapatawag kanang imong mga silingan nga nagbuhi og mga baboy ug mapangitaan og solusyon kanang hugaw sa mga baboy aron dili mangalisbo ang baho niini. Ilakip sab nimo sa pagreklamo kanang inyong atabay nga na contaminated na ang tubig tungod sa mga hugaw gikan sa babuyan. Kun di mo mahusay sa barangay, mamahimo sab ka nga adto mangayo og assistance sa City Health kay posibleng maka-apekto sa inyong panglawas kanang pagpangalisbo sa baho gikan sa hugaw sa baboy og ang kontaminado nga tubig sa atabay. I think, naay lagda ang City Health kalabot nianang mga baboyan ug manukan nga dili dapat itukod duol sa mga residential area. Daghang salamat og hinaut nga akong natubag ang imong pangutana. —Atty. Divine

Alang sa inyong pangutana, palihug sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.