Mga babayeng gangters

Makalaarma ang nahitabo sa grupo sa mga tinun-an nga babaye sa public school sa Barangay Babag Dakbayan sa Lapu-Lapu nga miparegla sa usa ka kaubang estudyante kinsa nakaangkon og mga bun-og sa lawas ug naukang pa ang koko niining biktima.

Aduna diay gang kining mga bayhana maong isog kaayo nga mopasakit sa mga tawo nga ilang kursonadang biktimahon.

Dili kini kasarangan kay ang naandan nga grupo hilig mangita og gubot mga lalaki man, apan kini mga babaye nga hilabihan ka mangtas.

Dili sila mga out-of-school youth kon dili estudyante sila sa usa ka normal school ug ingon niini ang ilang pamatasan ug pangutok nga sama sa mga kriminal. Dili na sila mga bata kay mga high school naman pero wala mohaum ang ilang kinaiya sa tawo nga adunay kamahoan nga nakuha sa eskwelahan.

Dili ba aware ang eskwelahan sa kalihokan sa ilang mga tinun-an? Gi-tolerate ra ba nila nga malambigit ang mga estudyante og grupo sa mga gangsters? Bisan og naporma ang grupo sa gawas sa eskwelahan apan tungod kay estudyante sila mas maayo seguro nga pangitaan nila og pamaagi nga masanta kining ingon niini nga bayolenting mindset sa ilang mga tinon-an.

Dili lang diay kausa malambigit sa kagubot ang mga miyembro sa grupo kay nakasala na usab sila niadtong buwan sa Enero pero gipasaylo lang sa biktima. Pastilan mao diay nga nag anad sila sa imang kamangtas. Luoy intawon ang mga tinon-an nga ilang makursonadahan kay ilang tabangan.

Gikonsenter lang pud diay sila sa mga ginikanan nganong ingon niini ang iyang kinaiya? Basin og maoy orientation sa ilang pamilya ug gipractice nila sa gawas sa ilang pinuy-anan nga manakit sa mga tawo.

Mga batan-on pa gani pero utok kriminal na, gasalig kay dunay gang nga magproteher kanila. Pamugno pa kini karon apan kong dili patagmon, sunod nila buhaton mopatay na og tawo.

Nanginlabot na ang LGU sa Lapu-Lapu, maayo unta og pasakaan sila og kaso kay anaa naman sila sa age of discernment aron maputol na ang ilang sungay mintras sayo pa kay kong pasagdan sila moabot ang panahon nga maghatag kini sila og mas dako nga problema.

Sa eskwelahan, total ban ang ipahamtang niadtong malambigit og kagubot o nag apil sa gang aron maprotehian nila ang ilang mga tinon-an ug ang imahen sa institusyon. Lain kaayo paminawon nga mabantog ang tunghaan nga pugaran sa mga gangster

Opiniyon ug balitang peke managlahi

“Walay moulipon kon walay magpaulipon.” Usa sa mga undanong panultihon ni Gat Jose Rizal, kinsa migamit sa balhibo sa manok ug tinta, isip iyang mga hait hinigiban batok sa mga Katsilang langyaw, kinsa gustong moulipon sa tanang kaliwatan tang mga Pinoy.

Diin tungod sa iyang duroha ka libro: Noli Me Tangere ug El Filibustirismo, daghang kaigsuonan tang tabunon ang nahigmata, mipormag pundok ug nakigbatok-gubat sa madaogdaogong mga Katsila. Ug naangkon sa Pilipinas ang kagawasang hingpit.

Unya, ning pagpamunoan ni Presidente Bongbong Marcos Jr., (PBBM) naampingan-napatagamtam ba niya sa katawhan ang maong kagawasan nga gibilin sa atong mga bayani? Bisan na lang unta ang matang sa kagawasan nga nalatid sa atong Konstitusiyon – ang freedom of press, of speech and of expression, nahatag ba niya sa tumang kaabli ug kamapailubon sa iyang kasingkasing?  Or, gipasagdan lang niya ang Kongreso nga ipatawag ang mga vloggers, kinsa igo rang mipadayag sa ilang opiniyon paghisgot sa tanang kahiwiang gihimo sa kasamtangang administrasiyon?

Nganong gibunyagan man sa Kongreso og fake news ang ilang opinion, nga managlahi man kini? Ang fake news mohimog balita nga dili mao ang tinuorayng nahitabo. Samtang ang opiniyon igo lang mohatag sa unsay ilang reaksiyon: positibo o negatibo man kini base sa unsay illang nakita-nadunggan sa balita?

Nga sa ato pa, kon ang gigikanan sa opiniyon-reaksiyon pekeng balita, dili gyod mahitabo nga ang opiniyon mahimo nang fake news. Kon adunay angay gukdon, ang mihimog fake news, ug dili ang mipabuhagay sa iyang opiniyon. Kay ang opiniyon, opiniyon! Ang fake news, fake news! Gani, ang opiniyon ning maong situwasiyon, biktima sab sa fake news. Ug may katungod sab sa pag-apil og gukod.

Tan-awa unsay nahitabo sa Kongresong mipatawag sa mga DDS vloggers kay fake news makers kuno? Sanglit, may ideya silang kulatahon-ipa-contempt ra ang resource persons sa Kongreso, didto na sila lahos sa korte aron mopayil og petition.

Aw, gimandaran sa Supreme Court ang Kongreso ug ubang dagkong lider nga hingtungdan, paghatag sa ilang komento sa naasoyng petition. Diin, sa mga umaabot imbestigasiyon, atong masayran, kinsa kanila ang tinuorayng fake news ug kinsay mipadayag lamang sa ilang opiniyon?

Unta, mahatagag tukmang silot ang mahukmang sad-an!