Mga Pamalandong matag Domingo Ni Father

Maayong Balita

Ang atong Ginoo niadto sa kamingawan sulod sa kap-atan ka mga adlaw ug gabii aron mangandam sa taliabot niyang misyon ingon nga Mesiyas. Apan sa maong pagpangandam nitungha usab ang yawa nga kang kansang tumong mao man ang pagpakgang sa laraw sa Dios pinaagi sa pagsulay ug pagtintal sa atong Ginoo sa nagkadaiyang mga paagi. Kun nisugot pa ang atong Ginoo sa mga haylo niini, nahimong pakyas ang laraw sa Dios. Apan ang atong Ginoo nagpabiling matinud-anon. Tataw alang kaniya ang matang sa pagkamesiyas ang angayan niyang subayon. Nakasabot siya niini ug nahigugma siya niini. Tinuod nagmadaugon ang atong Ginoo batok sa maong tintal apan ato usab nga Nakita nga ang yawa diay dili gyud mounding. Kay ang ulahing bahin sa ebanghelyo gitataw nga ang yawa nibiya lamang sa makadiyot. Nga sa ato pa, mobalik pa gyud kini aron padayong maghasol ug maghasi kang Kristo Jesus ug kanato nga iyang mga sumusunod.

Kasinatian

Sa daghang mga higayon kita gisulayan. Matag adlaw gisulayan ang atong pagkamatinud-anon ngadto sa Dios. Ang tintal dili man sala apan kahigayonan sa pagpakasala nga dunay lasting effect sa atong kinabuhi. Mahinungdanon kaayo nga atong buhaton kining mosunod: “Pray, Fast, and Give!” diha sa pag-ampo mas mapalig-on nato ang atong relasyon sa Ginoo bisan pa man kun wala na kitay pangayoon. Fast kun pagpuasa dili lang sa pagkaon kondili gikan sa atong mga kahilig nga naghinobra ug nakapalayo nato gikan sa Ginoo. Ingon man ang Panghatag. Ning paagiha mamahimo kitang makaamgo nga ang pagpitol sa kaugalingon dako og ikatabang aron dili dayon kita madaog sa mga pagsulay.

Lihok

Likay sa mga kahigayonan nga mahilayo ikaw gikan sa Ginoo diha sa imong pagkamaampingon sa kanunay.

Pangamuyo

Tanan: Ginoo ayaw itugot nga mahulog kami sa malisud nga pagsulay, hinunoa luwasa kami sa dautan. Amen