Tinuod ba ang charismatic gifts?

Unang gula

Unsay panlantaw niini Isip Katoliko?

Nipagawas og sulat ang Congregation of the Doctrine of the Faith: “Luvenescit Ecclesia” ngadto sa mga obispo ug sa mga Katolikong Matuohon kalabot sa kalambigitan sa Heirarchical ug Charismatic Gifts ug unsay implikasyon niiini sa kinabuhi ug misyon sa Simbahan niadtong Mayo 15, 2016. Gidawat niini nga anaa ang maong mga gasa sukad kaniadto ug hangtud karon diha sa kasaysayan sa Simbahan. Sa laing bahin giangkon usab niini nga bugtong ang Simbahan lamang ang adunay katungod ug gahom sa pagdason kun ang maong mga gasa tinuod ba o dili. Kun kini gikan ba sa Dios o dili. Gipanghinaut usab nga ang mga magbalantay sa mga kalag nga mamahimong magmaigmaton ingon man maalamon kalabot ning maong mga butanga diha sa ilang pagpanghukom sa mga tawo nga mahimong nagdala o nagkupot niini. Ingon man ang mga hingtungdan nga mga tawo ang mahimong abli ug tagana nga motahan sa kaugalingon aron giyahan sa pagtino kun ang maong mga gasa matuod ba ug gikan sa Dios o dili ba gikan sa laing tinubdan nga dili gikan sa Ginoo.

Ang mga Katolikong Eksorsista ang maampingon ug maigmaton kalabot ning mga butanga sanglit sayud sila nga ang yawa mahimong makahimo usab sa ingon aron linglahon ang katawhan. Kun ang katawhan nahimong mag-apas lamang sa mga gasa ug karisma pinaagi sa pagpahigayon og mga tongue workshops ug dili ang papangita sa kabalaan ug ang paghamtong sa birtud nan, makahatag kini og dakong suliran sa katilingban sa madugay o madali.

Unsa man ang hustong katolikong panlantaw kalabut sa glossolalia?

Kining maong hilisgutan nakahaling og debate sa mga teologo sa Simbahang Katoliko. Matag teologo adunay iyang kaugalingong panabut kun panlantaw kalabot sa pag-ampo ug paglitok sa mga nagkadaiyang mga pinulongan kun glossolalia diha sa mga panagtapok sa mga Charismatic Renewal Program. Atong hinumdoman nga ang nahimong sinugdanan kun tinubdan niini mao man ang pundok sa mga Pentecostal. Gitawag kini og Pentecostalism. Naumol ug nahatagan kini og laing bayhon diha sa atong mga Catholic Charismatic Renewal Programs. Hinuon daghan man ang mga Catholic Charismatic Groups nga nahimong masinugtanon sa Simbahan ug sa Herarkiya niini. Dugang pa, mayo silang pagkadala sa mga kaparian nga nagsunod pud sa hustong pagtulon-an sa Simbahan. Nakita nga dunay mga pundok nga gidumala og mga layko ug walay hustong giya sa aspetong espiritwal ug doctrinal ang Nakita nga mas Pentekostal ug dili Katoliko diha sa ilang pagsabot sa mga gasa sa Espiritu Santo kun charismatic Gifts.

Nagkahiusa ang mga mga Exegetes nga mga Katoliko nga ang nasinati nga glossolalia nga hitabo nga natala diha sa Mga Buhat sa mga Apostoles ug sa gihisgutan diha sa Unang Sulat ni San Pablo ngadto sa Taga Corinto ang dili susama sa nasinati ug nasabtan sa mga Pentecostals ingon man sa mga daghang Charismatic Groups.