Waiver and quit claim

Dear Atty. Divine,

Ang among kompaniya  manaktak og empliyado tungod sa kahinay sa ilang operasyon. Gipahibawo mi nga kutob nalang mi sa katapusan sa Hulyo. Adunay separation pay, 13th month pay ug uban pang pabawon nga ihatag ang company apan ila ming papirmahon og waiver and quit claim ini’g release sa maong bayad. Ang akong pangutana kun legal ba kining ilang pagpapirma kanamo og Waiver? Daghang salamat. -- Felix

* * *

Dear Felix,

Ang mga kompaniya o employer gitugutan sa balaod nga manaktak og empliyado kun alkanse ang ilang operasyon. Kanang Waiver and Quitclaim mao gyud nay papirmahan sa employer ngadto sa employee kun taktakon na sila dungan sa pagbayad sa mga empleyado sa mga dapat nilang madawat sama sa 13th month pay, separation pay, ug uban pa. Adunay mga desisyon sa Korte Suprema nga gikonsiderar nga valid ang waiver nga gipapirmahan sa employer ngadto sa employee apan aduna say ubang waiver nga gideklarar sa Supreme Court nga dili valid ilabi na kun gipugos ang empliyado sa pagpirma niini. Ang Korte Suprema sa ilang desisyon sa Goodrich Manufacturing Corporation vs. Ativo nga ilang gidesisyunan niadtong 2010 mihatag og upat ka rekisitos nga makonsiderar nga valid ang waiver and quitclaim: 1. Nga boluntaryo kining gipirmahan ug nasabtan sa empliyado ang unod niini. 2. Nga way nahitabong fraud or deceit sa pagpapirma niini. 3. Nga reasonable ug credible ang consideration niini. 4. Nga dili contrary to law, public order, policy og morals ang maong quitclaim. Busa kun nakauyon  ang employee sa tanyag nga amount sa employer then way rason nga dili mopirma ang empliyado sa Waiver and Quitclaim kay valid kini as long as naa ang upat ka mga rekisitos. Thank you and God bless. -- Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.