Para sa gugma sa Sugbo

Wala pa mohunong si outgoing Governor Gwen Garcia sa pagbangil sa mosunod nga administrasyon ni Governor-elect Pam Baricuatro. Human gi-boykot sa mayoriya sa Provincial Board ang gipatawag niyang special session paghatag og P1.2 bilyones nga supplemental budget nilang Vice Governor-elect Glenn Soco ug board members, naghimo siya og laing bugkos.

Nga gitumong sa pagpugos ni Baricuatro sa pagpadayon sa pagpatuman sa mga programa ni Garcia. Apil nang Suroy-Suroy Sugbo nga gideklarar nang Baricuatro nga iyang hunungon kay gitumong sa pag-ulog-ulog ni Garcia dili sa pagpalambo sa turismo sa Sugbo.

* * *

Bisan duha ka semana na lay nahibilin sa iyang termino, si Garcia nagdalidali pag-umol ug trust fund aron pagsegurong dili maputol ang iyang Suroy-Suroy, Sugbo Segurado, Sugbo Negosyo, Sugbo Kahanas, Sugbo Patubig, Sugbo Kuryente, Sugbo Semento ug Sugbo Sentro.

Gawas nga klarong desperado ang mga lakang ni Garcia, wala pa gyoy kapuslanan. Kay mahimo ra gyong suspensuhon ni Baricuatro ang pagpatuman sa mga programa ni Garcia. Kay si Baricuatro nay gobernador sugod sa udtong tutok sa Hunyo 30. Makahimo na pagpatuman sa mga saad nga nakapadaog niya sa eleksiyon.

* * *

Si Baricuatro ug dili na si Garcia ang mopatuman sa mga proyekto sa probinsiya sa nahibiling unom ka buwan karong tuiga, ginamit ang bisan unsang nahibilin sa P25 bilyones nga aprubadong budget sa Kapitolyo sa 2025.

Bisan ang labing lunod-patay nga board members ni Garcia maglisod sa paglalis nga mas mapuslanon ang gipasalig ni Baricuatro nga pagpalambo sa mga serbisyo ug mga ekipo sa provincial hospitals kay sa pagpamugos sa pagpadayon sa mga paukyab.

* * *

Hinaot nga mohunong na si Garcia sa pagsabotahe sa administrasyong Baricuatro. Kay gawas nga makadaot sa kinabag-an ang nabisto niyang mga maniobra, seguro pa gyong mabaraw sila kon makalingkod na si Baricuatro sa puwesto.

Hinaut nga dili na ipadayon ang pagpamugos sa pagbalhin sa mga trabahante sa iyang upisina ngadto sa upisina ni Soco ug sa iyang itoy nga board members. Hinaut nga bisan sa padayon niyang pagbugalbugal sa hukom sa Sugbuanong mga botante sa pagpalayas niya, paminawon ang gamayng tingog sa iyang tanlag: Nga kon tinuod siyang nahigugma sa Sugbo, angayng hatagan og kahigayonan ang bag-ong liderato.

* * *

[email protected]