Mga risgo sa kalangay
Dunay duha ka dakong problema nga nakit-an ang mga kongresista nga modumala sa prosekusyon ni Bise Presidente Sara Duterte sa pag-insistir ni Senate President Chiz Escudero sa paglangay og kapin sa lima ka buwan sa impeachment trial:
Madugangan ang kahigayonan nga mahilabtan ug mangawagtang ang mga dokumento sa gikuwestiyon nga mga gasto sa confidential funds sa Office of the Vice President (OVP) ug sa Department of Education (DepEd); ug
Mas mameligro ang mga saksi nga mabayran, mosibog, mahudlat o, simbako, mapatay kon unya pa sa Hulyo 30 sugdan ang husay.
* * *
Mahimong gipaburot sa mga sakop sa House panel of prosecutors ang mga hulga. Pero tungod sa kalapad pa sa impluwensiya sa mga Duterte sa nagkalainlaing mga ahensiya, militar, kapolisan ug armadong mga grupo, dunay sukaranan ang ilang kahadlok.
Takos ang gobyerno sa pagbaraw sa bisan unsang pagsuway sa mga Duterte sa pagsabotahe sa husay. Pero nganong mogahin pa man og laing minilyon ka pesos pagpanalipod sa proseso, puno sa nahaunang minilyon ka pesos nga gasto sa mga imbestigasyon sa House, nga mahimo ra mang sugdan nang husay karong buwana?
* * *
Mas dako ang hulga pagsabotahe sa gilangay nga impeachment trial kay ang nadakpan nga walo ka gidudahang mga espiya sa China nabistong dunay koneksiyon sa Chinese Embassy sa Manila, lokal nga mga opisyal sa Manila City, Tarlac City ug Cagayan Province ug Communist Party sa China.
Nahibawo ta kinsay paborito sa China sa 2028. Ilang ka-agresibo sa pag-ilog sa West Philippine Sea mo-garantiya nga dili nila pasagdang makonbikto sa impeachment trial ug mawani sa eleksiyon ang ilang kandidata.
* * *
Nipasumbingay nang Malakanyang nga dili si Escudero ang magbuot kanus-a ang husay. Niingon ang palasyo nga mahimong mosuwat ni Presidente Ferdinand Marcos Jr. ang mayoriya sa mga senador pag-awhag og special session, bisan kon pangulohan pa ni Senate Minority Leader Koko Pimentel.
Si Senador Alan Peter Cayetano nitingog na nga kinahanglang ipatigbabaw sa Senado ang proseso sa pagpaningil. Si Cayetano nisuway sa paglugway sa iyang termino pagka House speaker pero gibaraw sa bise presidente. Wala na mag-inusara si Escudero sa pagpahimulos sa sitwasyon para sa iyang personal nga interes. Kay si Cayetano mas Escudero pa ni Escudero.
* * *
- Latest
