Pagtangtang-uli sa CBRT barriers dugang gastos

Mahal na kaayo ang mga palaliton karon. Maong mas maayo untang makat-on sa pagka-wise spender dili lang ang katawhan, kondili, lakip na ang atong mga lider sa kagamhanan aron malikayan ang pag-usik-usik sa kuwartang hinagoan sa tanang magbubuhis.

Bilib ako sa atong giilang amahan sa lungsod o siyudad, kinsa moaksiyon dayon matag higayon nga adunay suliran bahin sa seguridad sa atong mga motorista, four-wheel drivers ug uban pa. Diin kon dunay disgrasiyang mahitabo, ang maong amahan mosusi gilayon unsay hinungdan? Nganong hasta nagpundong Cebu Bus Rapid Transit (CBRT) road separators, diin padayon pa ang pagtrabaho, hasmagan man gihapon sa mga nanagmotorsiklo?

Una, maayong masayran kon gibutangan bag safety warning signages sa contractor ang maong dapit aron magmatngon ang ang drivers sa ilang pagmaneho? Kadtong mga motoristang nangadisgrasiya sa Osmeña Boulevard sa miaging Pebrero 10, 2025, relihiyoso bang misunod sa road courtesy and discipline ug traffic rules/regulations sa kadalanan?

Kay kon ang contractor wala magmakulang sa pagpamutang og mga warning signages or nagdupang cordon sa nahisgotang barriers, aw, dili na nila sala ingkasog may motorista mang nangadisgrasya tungod sa kadanghag. Apan kon ang contractor walay pre-cautionary measures nga nahatag alang sa mga nanagdagang sakyanan, natural, obligado gyod silang maoy manubag sa maong pagpabaya.

Gumikan sa maong disgrasya, gipatangtang dayon ni Cebu City Mayor Raymond Garcia ang nahisgotang CBRT road separators. Pero ibalik ra gihapon kon mahuman-operational na ang CBRT lanes. Mianig nagkadaiyang reaksiyon ang maong desisyon sa mayor. May pipila midayeg, pero ubay-ubay ang misaway kay kuno nag-usik-usik lang sa kuwarta sa katawhan. Unta, wala na lang kuno ipatangtang ang barriers kon iuli ra man diay.

Segun sa akong pagsabot, gipakita lang sa mayor ang iyang pagkaamahan nga nagmahal sa iyang mga anak. Pero kini bayang too much love, maka-spoil sa mga badlongong anak. Kay inay disiplinahon ug pailhon sa ilang sayop, daw gilabanan ug gi-baby-baby man hinuon.

Tingale, may nindot anggulo sa panghitabo nga nakita sa mayor, unya wala makita sa mga mipalanog sa ilang pagsaway nga maoy gibasehan niini sa paghukom. Sa bagay, walay desisyon nga sayop. Lamang, adunay gitawag og good, better and the best. Busa, pili ka lang!