Panginabuhi batok kinabuhi

Napaig ang tulo ka mga bata nga nag-edad pa lamang og unom, upat ug tulo ka tuig sa sunog nga milamoy sa ilang panimalay ug sa laing pang 19 ka mga panimalay sa Barangay Mambaling, dakbayan sa Sugbo.

Ang tulo ka mga bata gibiyaan sa ilang mga ginikanan tungod sa panginabuhi. Giingon nga ang inahan nanginabuhi sa Carbon samtang ang amahan nag-drive og e-bike.

Asoy sa mga silingan, kanunay nga gibuhat sa ginikanan ang pagbiya sa tulo nila ka mga anak ug gisalig lamang sa kamaguwangan nga nag-edad og unom ka tuig ang pagbantay sa duha niini ka manghod nga nag-edad og upat ug tulo pa lamang ka tuig.

Wala pa sa saktong buot ang gisangonan sa pagbantay sa mga bata. Kun imong tan-awon ug sabton pulos pa bantayanan ang gipabantay ug gibantayan. Hinuon  hinayhinay nang naporma ang kabuot sa maguwang nga bata tungod kay imong nakita nga iyang gigakos ang duha niini ka manghod. Gani maingon nato nga mas may buot pa ang bata kay sa iyang inahan ug amahan.

Dili na bag-o nato kining nahitabo sa tulo ka mga bata nga gipaig sa kayo tungod kay aduna nay daghan nga nag-una nga susama kanila nga nahitabo na. Gani nagtuo ta nga dili na kini mahitabo pag usab. Pero aduna pa gyod diay ginikanan nga wala makaton og leksiyon sa mga nauna na nga kaso.

Samtang dili nato mapadaplin ang panginabuhi kay mao kini ang mag-abag kanato sa atong pagpakabuhi apan dili usab puwede nga isakripisyo sa pangibabuhi ang kinabuhi.

Makaton na unta ta og leksiyon ug mao na unta kini ang kataposan, dili na unta kini masundan.