Balik na sad ta kahadlok ani

Nabanhaw na usab “tanim bala” ng modus sa mga tugpahanan sa eroplano sa nasud? Sunod sunod man gud ang mga panghitabo diin nakuhaan og mga bala sa armas ang mga moagi sa airport sa atong nasud ug ang latest ang nahitabo sa Mactan Cebu International Airport. Unsa man gyud mobalik na sad ta og putos og plastic sa atong mga bage aron segurado nga dili matanoman og bala?

Basin natayming lang pud nga dunay kaso sa mga ingon niini didto sa kaulohan ug dinhi mismo sa Sugbo. Maayo man kadtong sa kaulohan kay nagsabasaba man ang tiguwang nga pasahero kay kong wala pa aw matik priso dayon ug natangtang ang mga naa sa likod sa maong tinonto.

Apan lahi ang sa Lapu-Lapu kay nagpakahilom man ang pasahero kinsa gipasakaan na og kaso human nakuhaan og mga bala. Unsa man tinuod nga nagdala pud seguro ang babayeng pasahero kay wala man moreklamo? Gikuhaan gani og pamahayag sa media estrikta man kuno kaayo ang anak niini nga wala mosugot nga ma-interview ang ilang inahan nga maoy nakuhaan og bala.

In fairness sa mga kawani sa Mactan International Airport, mga ligdong man na sila. Ambot kong mao pa ba gihapon ang mga staff diha nga akong nailhan kaniadto. Bitaw kong dili tinuod nga walay dala nga bala ang pasahero aw magsaba saba na unta kini bisan sa social media. Sila ra gyud ang nasayod.

Dili kalikayan nga mahadlok ang mga tawo nga moagi sa airport kay natagam na kaniadto nga tamnan og bala unya dili ra na bastabasta makalusot kay pasakaan man og bug-at nga kaso sama karon nga naay Comelec gun ban paita gyud.

Usa sa legasiya sa administrasyong Duterte ang pagpapas niining matang sa tinunto nga nakapaluag sa dughan sa mga tawo, ilabi na sa mga OFW. Apan kong tinuod man nga nabanhaw kining mga tampalasan, delikado kong moagi kita sa airport, mas maayo pa kong magbarko nalang o ba kaha mosakay sa silhig aron segurado nga dili mabiktima niining mga demonyo.

Bitaw, kinahanglan seryosohon kini sa atong gobiyerno ang pagsusi sa ingon niini ngq panghitabo. Kong naa silay madakpan ila dayon ipublikar idetalye sa media o social media ang pagkasakop nila, backup og mga CCTV footage aron transparent gyud ba. Dili sila magtagotago sa nahitabo kay mosamot ang pagduda sa mga tawo kanila. Mao ra gyud na ang pag alkontra sa taga airport aron dili sila mapasanginlan nga nagbinuang.

Kong tinuod nga adunay masakpan nga nagdala og bala aw pasakaan og kaso aron masilotan. Sa mga pasahero nga inosente, ayaw pagpakahilom. Reklamo gyud aron dili ka madihado. Ayaw og iluom kay delikado kon ikaw ang makasohan o nagpakahilom lang kay andam mobayad aron lang dili mahasol, asa ang hustisya ana.

Kong tinuod nga masakpan nga magdala og bala bisan pa man sa ka delikado, kagahi na na sa ulo og merisi kong masakpan ug makasohan.