Tabi kayo, superheroes, pasok ka na, Super Mario
HINDI magpapahuli sa uso ang Hollywood. Nabalitaan ng producers na kumita ang Minecraft video game nang $300 milyon. Simple lang ang produksyon. Cubes lang lahat ng elemento, mula buhangin hanggang barko. Isip lang ng naglalaro ang magpapagalaw, magpapalaki o liit, at magbabago ng kulay. Kayang-kaya ‘yan ng film studios.
Nag-uunahan ang producers maglabas ng 30 pelikula batay sa video games. Madali na ito dahil sa artificial intelligence: mas matinding special effects, mas mabilis na produksyon. Ipapalabas nila sa standard gadgets ng video games: mobile phone, tablets at computers.
Nitong nakaraang dekada ay nauso sa pelikula ang superheroes. Ang sarap naman talaga panoorin sina Superman, Spiderman, Batman, Wolverine, Captain America sa malaking telon.
Pero matatanda na ang nagbabasa ng komiks na pinanggalingan ng superheroes. May bagong henerasyon na ng manonood. Sila ang mas maraming mga Millennials, Gen Z at Gen Alpha. Sanay sila sa small screen at video games libangan nila.
May mga naluging isina-pelikulang video games. Halimbawa: “Doom”, “Monster Hunter”, “Tekken”, “Prince of Persia”, “Street Fighter”.
Pero mayroon din mga sobrang patok: “Transformers” franchise, “Resident Evil”, “Five Nights at Freddy’s”. Napansin ng producers na hinog na sa panahon ang mga pelikulang video games. Kumita ng $1.4 bilyon ang “Super Mario Bros” pangalawa lang sa “Barbie” nu’ng 2023.
Nakikini-kinita ng Economist magazine na taong 2025 papalitan ng video games at maglalaho ang superheroes. Maari magkaroon ng remake ng “Super Mario at Luigi” na paborito ng bata’t matanda.
Mas maraming naglalaro ng video games kaysa nanonood ng TV. Mas marami nang anim na beses ang nanonood ng Game Awards kaysa Academy (Oscar) Awards.
- Latest
