Duterte inilog

Gipanghingusgan pag-ayo ni Presidente Bongbong Marcos Jr. (PBBM) ang pagpangulo sa mga campaign rally alang sa pambatong senatorial candidates ubos sa iyang partido: ‘Alyansa para sa Bagong Pilipinas.

Apan bisan giunsa pa niyag pagdayeg iyang mga kandidato aron mahumot sa katawhan pinaagi sa pagpaila kanila nga pulos limpiyo-ligdong-kasaligan, igo ra siyang gikataw-an sa kinabag-an, kinsa hagbay rang giluod sa iyang kabakakon.

Kay sa tinuoray lang, kon imong hashasan ang matag usa sa gipanghambog niyang kandidato ug subayon ang mga tunob niini nga gibilin sa nangaging mga adlaw-bulan-katuigan sa ilang pagpangalagad, pulos wala gyoy mapili.

Sanglit, sagad may mga kahiwian mang nabuhat nga nakapamansa sa ilang imahe, diin bisan unsaon pa pagtabon og bakak moalisngaw gyod ang kabaho niini.

Segurado ka ba nga kining tanang pambato ni PBBM, dili kaantigo mamakak, dili mga balimbing ug wala mag-agap og pinansiyal-materiyal nga suporta gikan sa kasamtangang administrasiyon nga magamit alang ning umaabot midterm election?

Mao baya kini hinungdan nganong sa mga lugar nga ilang kampanyahan ni PBBM, bugnaw na kaayo ang tinagdan sa mga nanambong nga kadaghan na mabiktima sa iyang pagpakaaron-ingnon. Kadto lang rally nila sa Iloilo, diin sa iyang pag-abot, puwerting senyas sa crowd coordinator nga pakpakan si PBBM inig agi sa ilang tungod, pastilan wala gyoy naminaw.

Puwerting warawara sa wala’g tuo niining kamot, pero wala gyoy mibawos.

Sa Carmen, Davao del Norte Rally, napuno tuod ang venue, pero dili sa taga didto. Mas daghan ang taga lagyong lugar nga giingong hinakot sa daghang bus. Unya, dihang gipanggutom ug giuhaw ang nanambong, tungod sa pagpinaabot sa ayudang gisaad, gusto untang manggawas aron mamalit og pagkaon, pero ang gate giseradoan kay wala pa kuno moabot si PBBM. Diin, base sa video footage nga gi-post sa social media, puwerting bagulbol sa mga tawo, kinsa mipadayag nga kon wala pay ayudang ipanghatag, dili gyod unta sila mangadto.

Ug duna gyoy pundok nga wala makapugong sa ilang kasuko, kinsa nagdungan sa pagsinggit: “Duterte! Duterte! Duterte!” Timaan, ilang kasingkasing atua gyod diay sa mga Duterrte. Ug bisan sa ubang mga PBBM’S campaign rally, maglanoglanog sab ang maong mga siyagit.

Mga buhing kamatuoran, nga halos sa tanang dapit, ang bansagong Dutere, inilog!