Taras sa pagkabakon migawas

Sa unang adlaw sa kickoff rally nga gipahigayon sa Aliyansa para sa Bagong Pilipinas nga gipangulohan ni Presidente Bongbong Marcos Jr. (PBBM), iyang gipasiatab nga ang iyang 12 ka senador nga kandidato, wala gyod mahugawi-maduhig sa kanhi programang Tokhang sa miaging administrasiyon, wala sa ilaha ang pagpakig-abin sa pagbulsa sa sinakong salapi panahon sa pandemiya, diin napasagdan na lang ang mga nabiktima sa makalilisang sakit nga dala niini hangtod nangamatay.

Natulog ba si Bongbong Marcos, o gilupad sa laing talan-awon ang daw nagsalimuang na niyang panghunahuna sa maong mga adlaw-bulan-katuigan, hinungdan, nga wala niya makita ang suwabing paagi ni kanhi Presidente Rodrigo Roa Duterte (PRRD) diha sa walay hunong pagpakig-away sa maong gumonhap, diin sa kataposan nabuntog niya kini, napahinay ang mga kinabuhing naalaot ug nasalbar ang 110M kapin nga katawhan sa Pilipinas?

Medyo wala motug-an sa tinuod ang script nga gibasa ni PBBM sa iyang pagdiskurso atubangan sa iyang mga kaalyadong dumadapig ug sa 12 niya ka senatorial candidates, kinsa morag maoy naulaw sa iyang gipangyawit nga layo ra gyod sa tinuorayng nahitabo.

Matud ni PBBM, ang mga kandidato sa paga senador sa iyang mga kaatbang pulos walay nada-walay alamag kay maorag tig-deliver-hatod ra kunog suka pero nahatagan nag Certificate of Candidacy. Dili sama sa iyang mga kandidato, kinsa lunlon ligdong-limpiyo-kasaligan, dili korap ug namatud-an nang mga epektibong mangangalagad nga seguradong makahatag og kaayohan sa tanan.

Daghang tingkoy sa mga nagpakabana ang gipanugnaw pagkadungog ning maong gipangyamyam ni PBBM. Busa, kon giunsa man niya ang pagdayeg sa iyang mga senatorial candidate, gitugbangan kinig makahilong pangyamiid sa mga nagpakabana, kinsa gipul-an na sa panagway niining mga traditional politician nga bisag kapila na magalikbalik paglingkod sa Senado pero wala gyoy balaod-programa nga nakapalambo sa atong nasod. Sanglit, kaugalingon ra nilang interest maoy gibusog.

Tungod sa pagpamakak, 31M kaping botante ang nabudol, kinsa maoy nakapadaog ni PBBM sa miaging 2022 election. Ning padayon niyang pagpamakak, modaog pa kaha kining iyang gipaluyohang mga kandidato?

Makaalarma!  Sa proklamasiyon, siya nanawagan na nga kinahanglang 12 gyod sa iyang mga manok maoy padag-on? Yuna, kang kinsa bang atensiyon ang iyang gitawag: sa katawhan, o sa Comelec? Bida, pagkakulba baya!