Gabaan ra na sila

Gisaway sa Philippine Business for Education (PBEd) ang P6.326 trilyones ka pesos nga budget alang sa tuig 2025 kay wala magkadimao ang pagpahat niini hinungdan nga nasakripisyo ang angayan nga igahin unta sa sektor sa edukasyon ug panglawas ug gipalabi hinoon ang gahin alang sa discretionary funds.  Kining pagsaway sa PBEd daw nagpamatuod sa obserbasyon nga ang 2025 budget maoy labing “corrupt” nga budget sa kasaysayan sa nasud. Apan subo palandungon nga daw walay kagahum ang katawhan sa pagkorehir niini.    Ning kahimtanga, ato na lang hinumdumon ang alam-alam sa pildero’ng abogado ngadto sa iyang kliyente nga, “Sagdi lang ‘Nang, gaba-an ra lage na sila.”  Fezteleern!

Bakak sa China

Namahayag ang embahada sa China dinhi sa Pilipinas nga “fake news” lamang ang mikatap sa social media nga adunay bag-ong balatian nga mikuyanap karon sa China.  Gipanghimakak usab sa embahada ang balita nga mideklarar na ang China og ‘state of emergency’ tungod kay napuno na ang ilang mga hospital sa mga masakiton.  Segun sa atong kasinatian sa COVID-19 ingon man sa mga panghitabo diha sa West Philippine, dili kasaligan ang mga pamahayag sa China.  Mao kana’y giingon sa akong amigo nga, “Kon motoo ka sa China, sama ra nga wala ka motoo sa Ginoo.”  Madahaan!

Pagpanit sa iring

Gilagdaan ni Presidente Marcos, Jr. ang Executive Order No. 81 nga nag-reorganisar sa National Security Council (NSC) kansang tumong mao ang pagseguro nga maatiman ang nag-uswag nga mga isyu sa seguridad ug soberiniya.  Gipapha usab sa listahan si Bise Presidente Sara Duterte ingon man ang kanhi mga presidente isip miyembro sa council.  Dili maingon nga ang mga bag-ong gitudlo nga sakop sa NSC mao lamang ang batid sa hisgutanan sa seguridad ug soberiniya.  Busa maingon nga kolateral nga tumong sa bag-ong EO ang pagpalagpot sa Bise Presidente.  Haum ni’ng kahimtanga ang panultihon nga, “Daghan ang pamaagi sa pag-panit sa iring.”  Muleeng!

Nagtukod og branch

Matud pa sa Cebu City Transportation Office (CCTO), mikunhod ang gidaghanon sa mga makililimos sa dakbayan sa Sugbo karong tuiga kon itandi sa miaging tuig. Ang hugot nga kampanya sa Anti-Mendicancy Board maoy gitumbok nga dakong hinungdan sa pagkunhod sa gidaghanon sa mga makililimos.  Gituohand nga dakong “negosyo” ang pagpakilimos busa anaa gayod ang posibilidad nga wala mahanaw ang mga makililimos, hinonoa, namalhin lang sila og lugar gawas sa dakbayan.  Matud pa sa akong amigo, “Sa kadako sa kita sa pagpakilimos, hayan nga nagtukod lang sila og “branch” sa lain’g lugar.”  Atala lagee!

Magbaylo og panagatan

Gikwestiyon sa Lungsod sa Sta. Fe, Bantayan Island, Cebu, uban sa pipila ka mga environmental groups, ngadto sa Korte Suprema ang desisyon sa Malabon Regional Trial Court nga mipabor sa mga commercial fishing corporation nga makapanagat sulod sa municipal waters nga gitagana lamang unta sa mga gagmay mananagat.  Tataw nga maapektohan ang panginabuhian sa gagmay’ng mananagat kon ipatuman gayod ang desisyon sa korte.  Dason pa sa akong amigo, “Dili man usab mahimo nga magbaylo na lang, diin ang gagmay’ng mananagat adto sa lawod unya ang mga commercial fihers anha sa municipal waters.”  Pagkatoytoy!