Walay pabor-pabor
Nag-piyesta ang mga trolls sa mga Duterte sa eskandalo sa 2025 budget ni Presidente Ferdinand Marcos Jr. Mas gihingusgan ang propaganda nga ang pagpanggukod batok nilang kanhi Presidente Rodrigo Duterte ug Bise Presidente Sara gitumong sa pagtabon sa mga anomaliya sa administrasyon.
Panagang sa mga alyado sa administrasyon: Pulos ra pasangil ang giluwatan sa mga nagprotesta sa budget, nga gisakyan sa mga Duterte; samtang klaro ang nahipos sa House nga mga ebidensiya sa laktod nga pinatyanay nga gipasiugdahan sa kanhi presidente ug sa kinawatay sa confidential funds sa bise presidente.
* * *
Ang komplikasyon nakapalibog sa mga grupo nga nagsunod sa away:
Mga nag-apura nga kasilotan nang mga Duterte sa ilang mga atraso niawhag nga dili lang una tukion ang pagmaniobra sa budget kay mas dinalian ang panginahanglan sa pagpalagpot sa bise presidente sa puwesto aron sa pagseguro nga dili makabalik ang mga Duterte sa Malakanyang; samtang
Mga bilib sa mga Duterte niinsistir nga angayng palagputon dayon ang administrasyon nilang Marcos ug House Speaker Martin Romualdez kay mas dagko silang kawatan ug mahimong mabasiyo ang nasudnong panudlanan kon patuyangan.
* * *
Labing importanteng leksiyon sa nagsunod pagkabisto sa mga eskandalo sa mga Marcos ug sa mga Duterte mao nga walay mapili nila. Mahimong managlahi lang ang gidak-on sa katigayonan nga gipasangil nga ilang nahilabtan pero pulos sila dili kasaligan sa mga magbubuhis.
Sa ato pa, dili makaayo para sa nasud ug sa katawhan kon palabihon ang usa batok sa lain. Mas makiangayon kon gukdon ang tanang kalapasan, bisan kinsa pa ang responsable.
* * *
Mahimo ra gyong dunganon nga:
Ipadayon ang impeachment ni Bise Presidente Duterte sa House ug ang iyang impeachment trial sa Senado ug pagpasaka sa Department of Justice (DOJ) og kasong paglapas sa International Humanitarian Law batok ni kanhi Presidente Duterte; ug
Kuwestiyunon atubangan sa Korte Suprema ang legalidad sa laslas sa budget kahimsog ug edukasyon ug pagburot sa ayuda; imbestigahon sa Commission on Audit (COA) ang anomalusong mga transaksiyon sa Philippine Health Insurance Corporation (PhilHealth); ug kon tugkan og konsiyensiya ang mga kongresista susihon giunsa paggasto ang mas dako nga P4.5 bilyones nga tinuod nga confidential ug intelligence funds sa Office of the President (OP).
* * *
- Latest
