EDITORYAL — Kinsay mabasol?

Naalarma karon ang kapolisan sa Toledo City nunot sa nahitabong pag gang rape sa usa ka 8-anyos nga bata sa usa sa mga bukirong barangay sa maong siyudad.

Ang nakapasamot sa kabalaka, kay ang mga nanglugos mga menor de edad sab.

Nigawas sa imbestigasyon nga ang mga suspek miangkon nga sa porn site sa internet nila gisuon ang ilang gibuhat ngadto sa biktima.

Niangkon sab sila nga sa internetan sa usa sa mga kabanay sa mga bata nila kini natan-aw.

Karon nakapangutana ang tanan kang kinsa man kining sala?

Kinsa may angay basulon? Daghan.

Gawas sa mga ginikanan ug sa tagiya sa internetan, mabasol sab ang barangay.

Kay ang barangay mao ang kinauyokang panggobiyerno sa nasud.

Sila maoy gitahasan sa pagdumala ubos sa ilang hurisdiksyon, apil na niini ang proteksyon sa tanan ilabi na sa kabataan sa ilang dapit.

Dili unta sila magpa kampante lang nga duna silay curfew ordinance, kinahanglan kining ipatuman kada adlaw.

Aktibo sab unta sila dili lang sa panahon sa pagpamolitika sa ilang mga kaatbang.

Sila dapat mismo nakahibalo sa mga establisamento sa ilang hurisdiksyon ug unsa kini nga mga negosyo pinaagi sa pagpakisayod, pagpaniid ug paggamit sa ilang visiting ug police powers inabagan sa lungsod o mga ahensiya sa gobiyerno.

Dili lang unta sila kutob lang sa makita, makat-on unta og kinaiya nga panagana ang mga opisyales.

Ang porn sites pwede ra gyud i-block sa mga internetan kun kini adunay regulasyon gikan sa barangay o sa lungsod pinaagi sa mga ordinansa.

Mahimo kini nga ipaagi sa telco o diha mismo sa indibidwal nga mga internetan aron dili maka access ang mga bata nga moabang sa ilang kompyuter.