Saluyot: Para sa diabetic at may sakit sa puso

Isa sa pinakamasustansiyang gulay sa mundo ang salu­yot. Siksik ito sa bitamina at minerals tulad ng Vitamin A, C, E, K, Riboflavin o vitamin B2, Niacin o B3, Panthotenic acid o B5, Pyridoxine o B6, Folate o B9, calcium, iron, copper, potassium at iba pa.

Bukod sa mga nabanggit, ang saluyot ay mahusay sa mga taong may diabetes, sakit sa puso at may high cholesterol.

Narito ang kahalagahan ng mga bitaminang makukuha mula sa saluyot:

1. Ang vitamin K ay bitaminang nakatutulong upang labanan ang pagdurugo.

2. Ang vitamin A at beta-carotene ay para sa mata, balat o skin growth, pagre-repair o pagsasaayos ng selula sa ating katawan tulad ng paggaling ng sugat.

3. Ang vitamin B6 o Pyridoxine ay para makaiwas sa sakit sa mata na dahil sa pag-edad tulad ng age related macular degeneration.

4. Ang vitamin C o ascorbic acid ay napakalaking tulong para sa ating immune system at balat, at upang makaiwas o makapagpagaling sa ubo at sipon at hindi mauwi sa pulmonya o impeksyon sa baga.

5. Ang calcium ay kailangan para mapatibay ang buto, ngipin at gilagid.

6. Ang vitamin E ay mahalaga para lumakas ang immunity at magkaroon ng malusog na buhok at mata.

7. Ang iron ay kailangan para sa malusog na red blood cells.

8. Upang lubos na makuha ang mga bitamina at mineral sa saluyot, iluto ito bilang sahog sa dinengdeng, inabraw, paksiw, ginisang labong, sopas at bulanglang.