Kakiwaw milutaw, makauuwaw

Ang atong Kongreso ug Senado, inay magpanday og mga balaod in aid of legislation nga makahatag og kaayohan sa tanan, makapalig-on sa atong national security ug hingpit makapuo sa korapsiyon, ay pastilan, nagpunay hinuog gukod-latigo-kastigo taman sa ginhawa ni Bise Presidente Sara ‘Inday’ Z. Duterte ug kanhi Presidente Rodrigo Roa Duterte (PRRD), kinsa hagbay rang gisaludohan sa mga kinatas-ang lider sa nagkalainlaing nasod gumikan sa ilang mga buhing legasiya nga napondar dinhi sa ato.

Bisa'g unsaon pa kini pagbuhos og lapok sa mapahimuslanong Marcos-Romualdez-Araneta forces, mogilak gayod ang tiunayng kaligdong niini, nga dili mabayrag binilyon-trinilyong salapi. Nga nakatuhop na sa kasingkasing sa katilingbang nagmahal og good governance, kinsa nakatilaw niini sulod sa 6 ka tuig nga pagpamunoan ni PRRD ug sa 2 ka tuig kapin nang pagka-bise presidente ni Inday sa Pilipinas.

Hinungdan, panahon sa mga kalamidad sama sa bagyo, lunop ug baha, mingawon gyod ang mga naapektohang lugar ug mga lumolupyo sa garantisadong tatak-Duterte brand nga pagpangalagad. Kay naghinangat pa lang ang bagyo, nakapuwesto na mga rescue team ug naka-ready na mga relief goods nga makigharang sa umaabot nga gumonhap.

Ug mao kini ang gihimo sa Office of the Vice President ni Inday. Bisag wala na siyay confidential fund sugod 2023 ug gibawasan pag sobra sa katunga iyang OVP budget para sa 2025, paghugpa sa bagyong Kristine nga mipabaha sa Luzon ug sa ubang dapit, labi na sa Bicol, diin mga sakyanan nanglutaw-nangaanod ug milapas sa mga atop ang tubig, otomatik nahatod gilayon sa mga OVP satellites ang kinartong relief goods ngadto sa mga nabiktima.

Samtang si Presidente Bongbong Marcos Jr. mao pay pagpahigayon og press briefing sa iyang cabinet members aron hisgotan ang angay nilang buhaton pagsalbar sa mga naapektohang walay puas nga nagtiyabaw-nangayog panabang sa atong gobiyerno.

Diin, sa panagway ni Bongbong milutaw ang kakiwaw, ang pagkawalay alamag sa pagpakig-away sa mga kalamidad. Busa, miungot-naghinutoktok ug napakawot sa iyang ulo dungan ang pagtug-an sa tinuod ngadto sa iyang ginsakopan: “A..ano ang gagawin natin?”

Pastilan, presidente, timonil sa atong nasud, unya wala masayod unsay buhaton?  Dili ba kini, makauulaw? Ug naghatag og kakuyaw diha sa atong padayong paglawig?

Oh, Ginoo, salbara kami!