Kay gipalusot man

Mokabat sa 65 ka smuggled right-hand drive vehicles ang nasakmit sa hiniusang operasyon sa mga ahensiya sa kagamhanan niadtong Lunes sa usa ka yarda sa Barangay San Isidro sa dakbayan sa Talisay diin daplin ra gyud sa karsada kini nahimutang bantang ra kaayo.

Mipadangat og reklamo ang Land Transportation Office kon LTO ngadto sa National Bureau of Investigation NBI-CEVRO nga mao usay mitrabaho sa paghimo og surveillance.

Nagkuha dayon sila og search warrant sa korte nga maoy gigamit nila sa ilang operasyon nga gitambongan mismo ni DOTR Assistant Secretary Vigor Mendoza II kinsa mao usab ang hepe sa LTO ug Transnational Crime Special Envoy Markus Lacanilao ug mga opisyal usab sa NBI.

Didto nakita ang mga multicab ug duha ka mga dagkong sakyanan nga pulos right-hand drive diin nasayran nga kong dunay mopalit ayha pa nila i-convert ngadto sa left-hand drive nga gihulagway sa mga otoridad nga peligro o dakong hulga sa road safety.

Gikan sa Japan ang mga surplus nga sakyanan ug gipalusot sa Sugbo. Ug dinhi ginegosyo ug mao usab ang gipamalit sa mga tawo nga dili maka-afford sa hilabihan ka mahal nga mga brand new nga sakyanan. Gamit usab kini kaayo sa panginabuhi kay makargahan man og mga produkto labi na sa bukid.

Ang usa sa tag-iya usa ka Peruvian national nga giingong turista lang ang estado niini sa nasud ug nganong nakabutang kini og negosyo kauban ang partner nga Filipino. Gipakita sa langyaw ang mga papeles sa negosyo nga naay business plate ug rehistro sa Securities and Exchange Commission kon SEC.

Matud sa mga otoridad nga gawas delikado sa road safety, dako usab ang nawagtang sa panudlanan sa kagamhanan kay wala man magbayad og buhis kining mga smugglers nga nagpalusot sa mga sakyanan.

Tataw kaayo nga illegal ang negosyo kay mga right-hand drive gud ni ug smuggled pa gyud, nganong nakakuha man sila og mga papeles sa pag negosyo? Sa kadagko ug kadaghan sa mga sakyanan nganong nakalusot man kini sa nasud?

Giagi gyud ni og mga pantalan ug imposible nga dili mabantayan kay dili baya kini mga gagmayng duwaan nga mga sakyanan.

Klaro kaayo nga dunay panagkunsabo sa mga smuggler ug sa mga personnel mismo sa mga ahensiya sa kagamhanan nga nagbantay unta nga makasulod ang mga pinalusot nga sakyanan.

Dili na gani kini maisip nga bag-o pa kay kong motan-aw lang ka sa mga karsada daghan na kaayo nagdagan sa mga susamang sakynanan nga converted na, ug nganong nakalusot ug narehistro pa? Walay smuggled vehicles kong wala kini tugoti nga makasulod sa nasud.

Kini ang dakong hagit sa kagamhanan nga limpyohan mismo ang mga ahensiya kay kon dili mahulog ra gihapon sa wala ang ilang paggukod sa mga smuggler kay giprotehian man sila sa ubang badlongon nga kawani sa kagamhanan. Simple lang nakalusot ang mga sakyanan kay gipalusot man.