Mahimo ba nga ipailawom og Eksorsismo ang Dili Katoliko ingon man ang Dili Kristiyano

(Ikaduha nga bahin)

OO labina kun moduol o mangayo og pakitabang. Hinuon, kinahanglang susihon sa pari kun unsang matanga sa tabang o hinabang ang mahimo alang sa biktima kun pasyente. Kun ang kaso napamatud-an gyud nga nayawaan kun certified case of demonic possession, ang obispo ang kinahanglang pahibaw-on ug paminawon ang iyang tambag ug sundon ang iyang sugyot.

Ang sukaranang prinsipyo nagasukad niini: “Salus Animarum Suprema Lex” kun ang kaluwasan sa mga kalag maoy pinakataas nga Balaod! Ang Simbahan gumikan sa iyang dakong tinguha ug gugma sa pagluwas ni bisan kinsa ang mopatalinghug sa baruganan: “Ecclesia Supplet”diin sa kakulangan sa pagtuo ug kahibalo ang simbahan mopuno. Ning paagiha wala masakripisyo ang kalunsay sa atong pagtuo.

Padayon kitang nisaksi sa atong pagtuo nga Santisima Trinidad, ngadto kang Kristo Jesus ang Pulong nga Nagpakatawo, ang pangama ug hinabang sa Mahal nga Birhen Maria ug sa mga Santos ug mga Angheles. Ang paggamit sa mga sakramentales ug nga ang mga dili Katoliko ug dili Kristiyano atong dasigon uban ang pagtuo nga ang Dios sa tinud-anay motabang gyud kanila.

Dugang niini nga ang tim-os nga pagkamatinud-anon sa Katolikong Pagtuo samtang nangalagad sa mga Biktima sa mga dautang espiritu diha sa Pangalagad sa Kalingkawasan ug Eksorsismo, usa man ka mapuslanong kahimanan sa pag-ebanghelyo.

3. Ang mga Dili Katoliko o Dili Kristiyano duna bay Susamang Pangalagad Alang sa Kalingkawasan? O Maisip Ba kini nga Eksorsismo Usab?

Kun susihon kini sa internet dunay daghang mga susamang balansayon gikan sa mga Dili Katoliko, Dili Kristiyano o bisan gani sa mga pagano. Hinuon dili nato sila angayang hisgutan dinhi sanglit ang ilang pamaagi lahi ra kaayo ug wala mahiuyon sa atong doktrina ug pagtulon-an.

4. Ang mga Tambalan ug Albularyo Makahimo ba og Eksorsismo?

Hugtanon gyud kaayo ang Simbahan ug ang Balaang Kasulatan sa pagtudlo nga bugtong ang Dios lamang ang dunay gahom sa paghingilin sa mga yawa. Diha kang Kristo Jesus ang lihok sa yawa nagun-ob, nalaglag ug ang Gingharian ni Satanas nalumpag. Ang uban sama pananglit kadtong nagbansay sa mga okulto ug mga tambalan o albularyo ang nimando sa mga yawa pinaagi pud sa hinabang sa ilang mga abyan nga mga dautang espiritu usab. (Padayon)