Balay sa mga pagsulay

Namatikdan. Inay tanang mangangalagad sa publiko magtinabangay paghatag og makabuhong nga pagpangalagad sa katawhan, ang mga kongresista ubos sa pagpamunoan ni House Speaker Martin Romualdez nagpunay na hinuo'g tira ni Vice President Sara ‘Inday’ Z. Duterte, kinsa pirmeng nagtinarong sa iyang trabaho, diin libolibo nang kabos ang natabangan sa iyang Offfice of the Vice President (OVP).

Imbes suportahan sa opisyales ug mga miyembro sa House Committee on Appropriations ang 2025 P2.03B OVP budget proposal ni Inday aron makapadayon paghatag og maayong serbisyo, naghimo man hinuon silag scripted trap gamit ang wala nay labot nga 2022-2023 confidential fund issue, lamang aron matuman ang hagbay rang gitinguha nilng pag-impeach ni Inday.

Para asa ba diay ang pagpangalagad sa atong mga kongresista karon? Nahunahuna ba nila nga ang paglaslas og 70% sa OVP budget proposal, sama rang ilang gipugngan ang mga kaayohan-benepisyo nga natilawan sa mga naninahanglan sulod sa duruha ka tuig kapin nang pagka-workaholic sa atong bise-presidente?

Ginaingon, nga anaa kuno sa Kongreso ang daghang kuwarta. Sa usa sa mga diskurso ni kanhi Presidente Ridrigo Roa Duterte, siya miingon: ‘Nga may politiko, kinsa kaniadto simple lang ang pamuyo. Seiko ray relo. Apan dihang na-kongresista, mga Rolex nay ipangsul-ob.

Hasta si Inday, sa usa ka press conference mibulgar. Nga ang nagdala-kontrol sa kinatibuk-ang budget sa Pilipinas duruha ra ka tawo: House Speaker Romualdez ug House Chairman, Committee on Appropriations, Rep. Zaldy Co, Hinungdan, halos tanang Kongresista nahimo nilang mga itoy nga hinigtan. Kon unsay gusto sa agawon, kinahanglan tumanon. Kay kondili, aw, di ka tagaag budget sa imong proyekto. Basta, kutob sa mosupak sa mga hiwing paagi sa administrasiyong Marcos, ila gyong lisodlisoron. Ug paningkamotan pa nilang ma-impeach!

Mao nga gipakasama ko ang House of Congress nga balay sa mga pagsulay. Dinhi gisukod sa Ginoo, kinsa sa mga kongresista ang daling matental sa salapi ug kinsa gyoy dili? Bulahan ang wala magpadala sa malinglahong gahom sa salapi kay may luna sila sa langit. Apan alaot ang magtigom og daghan niini kay malaglag ilang kalag ug lamyon sa impiyerno.

Unta, mahinuktokan kini sa tanang hingtungdan. Buwahan ang balay sa mga pagsulay, dili mahimong balay sa mga panulay.