Lung-agon daan

Mipasidaan ang Department of Agriculture nga mahimong pasaka-an og kaso’ng hoarding ang mga importer sa bugas.  Aduna’y gibana-bana’ng nagkantidad og P555 ka milyon nga bugas nga wala pa kuhaa ug nagpabilin’g natanggong lapas na sa 20 ka adlaw diha sa Port of Manila.  Gituohan nga nagpaabot pa ang mga consignees nga mosaka ang retail price sa bugas aron usab modako pagsamot ang ilang ginansiya.  Balik-balik na man lang kining pasidaan sa DA.  Sugyot sa akong amigo, “Mas maayo tingale nga, agi’g silot, lung-agon na lang daan ang wala pang-kuhaa nga bugas una pa kini i-uli sa consignee.  Tan-awon nato’g di ba ni sila maglumba’g lukat sa gipangtanggong nga bugas.” Madahaan!

Dismular kay sipyat

Gisalindot sa Korte Suprema ang hukom sa Commission on Audit nga nagpahamtang og silot-administratiba batok sa usa ka opisyal sa PhilHealth sa Central Luzon tungod sa giingong irregular payments. Matud sa Korte, dili maka-imponer ang COA og civil liability kay nahisama na kini sa penalty o multa diin ang COA walay kagahom sa pagpahamtang.  Makadaghan na nga naumod ang COA sa korte tungod sa ilang mga sayop nga audit findings.  Makapahinumdum sa contestant sa diving competition nga nagkadugo ang simod pagtunga niya gikan mi-dive, busa agi’g dismular, misiyagit na lang kini sa pag-ingon,“M-O-M-O…Mômô.”  Pagkatuytoy!

Balay sa lawâ

Gibarogan sa Sandiganbayan ang kanhi resolusyon niini nga nagmando sa retirado’ng military comptroller nga si Carlos Garcia sa pagbayad og mokabat P407.8 ka milyon nga multa isip kabahin sa iyang pagka-konbikto sa sa sala’ng direct bribery ug money laundering samtang diha pa siya sa military service.   Bisan sa kadaghan na sa nakonbikto sa sala’ng pagpangawkaw, daw kuyanap ug minilyon na man hinoon ang pagpangawat sa kaban sa kagamhanan.   Matud pa sa akong silingan, “Ang atong balaod nahisama sa balay sa lawâ-lawâ. Kon lamok lang ang mosapigad, madakpan gilayon, apan kon dagkong buyog, molahos lang nga walay panaban-saban.” Muleeng!

Kwarta ug kahangol

Nagtoo si Cebu City Councilor Noel Wenceslao nga makadaginot ang dakbayan sa Sugbo sa pundo nga igahin alang sa garbage disposal kon istriktohon ang pagpatuman sa “No segregation, No collection” policy.  Dili man unta malalis ang kaanindot sa katuyoan sa maong polisiya apan dakong tanghaga kon ngano nga wala man kini maimplementar sa hingpit.  Mao na’y giingon nga, “Basta sagulan gani og pinansyal nga interest ang suliran sa basura, walay kasulbaran nga makab-ot.  Kay dili man ma-segregate ang kwarta ug ang kahangol.”  Fezteleern!

Mora’g tambal

Matud pa sa Department of Health, pareho ra nga epektibo ang mga generic nga tambal kon itandi sa mga branded nga kaatbang niini apan kinahanglan lang nga magmabinantayon ang mga konsumidor batok sa mga peke nga tambal nga anaa sa merkado.  Bisan pa sa pasalig sa DOH sa ka-epektibo sa generic drugs, branded lang gihapon ang paliton sa akong silingan bisan kon medyo mahal kini kay matud pa niya, “Ang generic kay mora ra man gud og tambal, busa inig tumar nimo, mora ra pud ka’g maayo.”  Atala lagee!