Kahoy
Nagtigum ang grupo nga Carbon PH ug ilang gilaraw ang pagtanom og napulo ka milyon nga kahoy sa kilid nga bahin sa Mananga River sa Dakbayan sa Talisay ug Lusaran River sa Dakbayan sa Sugbo. Ang laraw sa grupo gipaluyohan ni Cebu City acting Mayor Raymond Alvin Garcia kinsa miingon nga dako og ikatabang sa pagpugong sa mga pagbaha nga nasinati sa mga barangay nga nahimutang sa ubos nga bahin sa Dakbayan sa Sugbo ang mga kahoy nga ipangtanom.
Sa dakbayan sa Sugbo, miabot sa 74 ka ektarya nga kakahoyan ang nawagtang sa tuig 2023 samtang miabot ngadto sa 609 ka ektarya nga kakahoyan ang nahanaw sa Dakbayan sukad niadtong tuig 2021 hangtod tuig 2023.
Mahinungdanon kaayo ang pagpananom og kahoy hinungdan nga niadtong tuig 1978 kun wala ko masayop mipakanaug og Presidential Decree si Presidente Ferdinand Edralin Marcos Sr. nga nagmando sa pagpatanom og kahoy sa mga mogradwar sa ilang pagtungha.
Gawas niini, daghan usab nga kahugpongan ang nagpasiugda og mga pagpananom og kahoy nga kalihokan apil na niini ang mga lokal nga kagamhanan apan walay namugna nga lasang o kakahoyan. Kini tungad kay wala balika sa nananom ang ilang gitanom.
Sugyot nako sa Carbon PH nga kun tinud-on nila ang pagtanom og napulo ka milyon nga kahoy kinahanglan nga ila kining balikon inig human nila og tanom aron ilang makita wala ba ungara sa baboy o sabsaba sa kanding ang kahoy nga ilang gitanom.
Aron maseguro nga balikon gayod sa nagtamom ang iyang gitanom, mas maayo nga ang patamnon sa grupo ang mga tawo ra usab nga duol sa ilang tamnan tungod kay ang rason nga dili mabalik ang gitanom tungod sa kalayo sa gipoyan sa mga tawo nga nananom sa kahoy.
Mas maayo nga ang himoon grupo nga Carbon PH dili lang tree planting kun dili ilakip pod nila ang tree growing. Dinhi makaseguro ta nga aduna nay kakahoyan o lasang nga mamugna sa pagpananom og kahoy.
- Latest