French Olympian nga si Yabusele gikuha sa Sixers
CEBU, Philippines — Ang power forward sa France basketball team nga si Guerschon Yabusele gikatakda nga mopirma og kontrata uban sa Philadelphia 76ers.
Si Yabusele mitabang sa France pagsakmit og silver medal sunod sa koleksiyon sa mga bitoon sa NBA nga migiya sa Team USA ngadto sa bulawang medalya sa bag-ohay pang natapos nga Paris Olympics.
Sigun sa taho sa ESPN ug NBC Sports Philadelphia, ang kanhi Boston Celtics miuyon sa usa ka tuig nga kontrata sa Sixers nga mibalor og $2.1 million.
Ang 28-anyos nga si Yabusele nakaduwa og 16 ka higayon uban sa Celtics sud sa duha ka seasons nga natapos niadtong 2019. Human niini, miduwa siya og usa ka season didto sa China ug laing usa sa France sa wala pa mitapon sa Real Madrid nga iyang gitabangan aron makampiyon sa 2022-23 EuroBasket season.
Apil sa impresibo niyang salida sa Olympics mao ang paghansak niya sa bola atubangan ni LeBron James atol sa ilang sangka sa kampiyonato.
Si Yabusele mibubo og 22 puntos batok sa Canada sa quarterfinal ug 17 puntos batok sa Germany sa semifinal. Batok sa mga Amerikano, mipabuto siya og 20 puntos.
Sa poder sa Sixers, makauban ni Yabusele ang duha ka NBA All-Stars nga sila si Paul George ug Joel Embiid.
- Latest
